Profesionalismo ta destaca y ta anima tur sector pa superacion
- E expresion tradicional Carnaval a bira sosten total pa Florin
- Plan di formacion Gobierno Wever-Croes visibel den progreso
ORANJESTAD (AAN): Celebracion di Carnaval, ademas di e alegria cu e ta representa pa e pais, ta un mashin di produccion, cu ta crea cuponan di trabou, ta sostene actividad comercial.
Hotelnan ta saluda turistanan, restaurantnan tin mas cliente, companianan di aviacion ta beneficia hunto cu e cas di e pober , cu ta haya oportunidad pa gana placa cu su abilidadnan manual y talentoso pa asina yuda cubri gastonan familiar.
Den un ambiente positivo y di gozo, Florin ta lora na Aruba pa trece alegria y alivio financiero cu sostene fondonan pa cubri gastonan den un bon gobernacion, cu mester di un Florin fuerte.
Democracia ta entrega na Gobierno e deber, pa dia y anochi den tur circumstancia, percura pa e bienestar di Pueblo y evita cu peligernan cu Pueblo mes no por mira, pone bida y felicidad di ciudadanonan na peliger
Pa esaki por ta realidad, Gobierno mester haci posibel pa gruponan cu ta traha na bienestar di comunidad, por aporta cu nan conocemento, pa asina entrega na e pais un presente y futuro realmente feliz.
Loke riba tereno di gobernacion mester bini dilanti den e temporada di Carnaval, no ta e gobernante cu ta busca voto den eventonan publico, pero e gobernante cu ta duna prueba cu e ta conciente cu pafor di mundo politico tin gruponan y ciudadanonan cu ta sostene e cuido di comunidad.
Pa por determina si Gobierno ta cumpli cu su tarea, mester bay di regreso na formacion di e Gobierno y sigur e prome palabranan y obranan di e actual gobernantenan.
Den caso di e actual gobierno, a mira con a atende cu tur agrupacion y organisacion di Aruba, pa haya e base di loke gobernacion mester contene.
Pa e esfuerzo aki duna fruta y Aruba conoce adelanto, e gruponan aki mester por funciona.
E hecho cu Carnaval ta kita for di hende preocupacion y ta un tempo di gozo, ta haci e temporada di Carnaval un tempo peligroso pa hende. Esaki mas ainda ta e caso, ora Carnaval ta exigi hende crea un mundo cu no ta existi y haci loke generalmente hende no ta haci.
E berdad cu ta aplicabel tambe pa turista, cu kier goza di nan estadia pero na momento cu nan wordo confronta cu cualkier problema, cu Ley no a regla debidamente, por afecta e reputacion di un destino turistico.
Carnaval no ta un producto turistico exclusivo di Aruba y ta un celebracion mundial, loke ta haci cu mester proteha e ciudadano pero tambe presta atencion na competencia di otro pais den un mundo cu exigencianan moderno.
E ruido, e sonido cu tin un impacto enorme riba hende manera estudionan cientifico a determina, mester ta mara na limite den nos mundo moderno.
Hasta e detaye aki ta bini dilanti den e informacionnan di celebracion di Carnaval, cu a bira realidad a base di e participacion y e aporte total den comunidad.
Hospital, Polis, Rode Kruis, tur organisacion boluntario y instancianan gubernamental envolvi, ta sostene e creacion di e base cu democracia ta exigi pa ta preocupacion di Gobierno.
Uno di e problemanan grandi di Carnaval, ta e seguridad di hende, cu den e ambiente di fiesta y fantasia, ta perde nocion di realidad.
Esaki ta haci cu uno di e informacionnan mas importante pa DIARIO na 2024 ta, cu e Oficna di Maneho di Crisis a entrega na Gobierno, un Plan pa Seguridad di Aruba pa Carnaval.
Di e forma aki, Aruba tin un guia na cual tur grupo di Carnaval a participa, pa celebra Carnaval na un forma mas responsabel loke ta sostene e balor di bida y bienestar di e Arubano y ta entrega e turista tambe e sentido cu Aruba ta proteha su participantenan na Carnaval, loke asina ta duna e siguransa na e turista, cu no ta den un Wild Wild West, e ta celebra Carnaval.
CMO, KPA, SMAC, DTI a atende cu comunidad pa entrega un plan cu ta bay directamente contra peliger durante Carnaval.
Pues a scucha comunidad pa asina soluciona un peligro pa comunidad, loke ta duna contenido na un democracia participativo.
Carnaval 70 pa nos asina ta haya un nificacion sumamente valioso den cual gobernacion ta uza su expertonan, pa den union cu participantenan conocedor di eventonan cu nan ta organisa, ta entrega reglanan nobo na e comunidad democratico di Aruba, e pais cu un base legal, cu ta proteha e hende bou tur circumstancia.
