Michella Lacle, Presidente di e Comision ta splica:
ORANJESTAD (AAN )—Michella Steenvoorde- Lacle, Presidente di Comision Plan di Mayor, a menciona kico ta un Plan di Mayor. El a splica cu esaki ta un areglo riba papel, cu por bay aplik’e via un deurwaarder, y den e regeling aki e mayor ta skirbi précis con e ta bay regla e alimentacion, e cuido, y otro diferente tema cu ta bin den dje.
“Anto, ta obligatorio pa mayornan cu ta casa y ta divorcia pero ta obligatorio tambe pa mayornan cu ta biba hunto y ta bay separa. Nan mester traha un plan di mayor. E ley aki ta existi desde 2009 caba na Hulanda. Kiermen, e tin 14 aña caba aden. Dus, nos por siña di nan e erornan y di nan aciertonan, y nos por pase pa nos cultura.
Den e plan di mayor mester bin, obligatoriamente, ken tin e custodia completo di e yiu(nan), e lugar unda e mucha ta biba cien por ciento, e alimentacion, e areglo di contacto, y con nan ta haci e areglo di bishita. E mayor unda e mucha ta biba completamente tin cu informa e otro mayor, tocante scol, dokter, etc., extra gastonan escolar manera airco-geld, of si e bay un famia unda tin un fiesta, ken ta paga pa e regalo. Detayenan asina cu, generalmente, no ta pensa riba dje y cu ta causa pelea”, Michella a señala.
El a agrega cu nan a introduci esaki, pasobra nan ta pensa cu e ora ey ta bay tin mas contacto entre e mucha y su otro mayor. Kiermen, e mayor cu ta abandona e hogar, y esaki a wordo demostra.
“Tambe nan a pensa cu lo bay bin menos conflicto entre e mayornan; esaki si, no a wordo proba. No tin menos conflicto. Na cuminzamento ta bay tin mas conflicto pasobra tin cu bay papia riba tur e detayenan, pero si tin menos conflicto na termino largo.
Encuanto e efectonan di divorcio pa e muchanan, aworaki, ainda nan ta analiza e resultadonan di esaki, y nan a demostra cu e muchanan ta sinti miho den nan sapato. Den e prome resultadonan, vooral cu e implementacion di KIES a sali caba cu enberdad e muchanan ta sinti nan mes miho, nan ta haci miho na scol, etc.
