Diasabra awo special pa pueblo y tur ex-alumno
ORANJESTAD (AAN): E lo bay ta algo grandi pa festeha! E hecho cu e aña aki, Pius X School na Dakota ta celebra su di 65 aña di existencia. Gwendeline Bergrok di e scol a splica cu tabata dia 16 di Februari 2025 nan a celebra e fecha ey di 65 aña. Durante henter aña cada luna a festeha esaki cu e muchanan.
Pero e gran atraccion ta cu nan ta organizando un fiesta grandi pa asina publico por sigui yuda sostene e scol aki. Cu e tema di ‘One Night To Remember’, e fiesta lo bay ta Diasabra dia 28 di Juni 2025 den Ballroom di Hilton Aruba Resort & Casino. E lo ta for di 8:00 pm te cu 2:00 am. Nan a ricibi conseho y yudansa valioso di Sharine Geerman pa a haci esaki.
Entrada pa e actividad aki ta 100 Florin, y pa e Fundraising Gala Party aki lo bay tin presentacion di e.o. Songo, Robert Jeandor & Solo Banda Show, Dakota All Star Band, y tambe DJ Metropolis. Lo tin presentacion di Taxi Dancers tambe.
Musiconan di Dakota a uni y special pa e fiesta aki a crea un ‘Dakota All Star Band’ bao direccion di Amado Rosina, pa asina anima e actividad estilo ‘Dakota Tur Dia’ pa tur hende. E lo ta un fiesta yena di ambiente, cu e comision di scol a traha duro p’e bira algo fenomenal. Dakota All Star Band lo bay ta cerando e fiesta di 65 aña di Pius X School.
Cabezante di scol, Sheila Tromp a splica durante un conferencia di prensa cu e fiesta aki tabata den planning for di tempo cu nan a cumpli 60 aña di existencia, sinembargo Pandemia di Covid-19 a stroba esey. Pero awor si, cinco aña despues nan ta cla pa celebra hunto cu comunidad di Aruba y tur ex-alumno. E fondo recauda lo bay pa algo completamente dedica na e scol.
E anochi aki lo bay tin un Photobooth special pa saca potret como recuerdo, tambe tin e aparato di 360º pa graba un video chikito unda e camera ta draai rond di e plataforma. Tur hende cu carchi, lo tin un QR-Code su tras, y e anochi aki bo por scan e code, y download tur potret cu wordo saca e anochi ey di fiesta.
A ser splica cu lo tin diferente doorprize tambe pa publico, y pesey nan ta gradici tur patrocinador cu a yuda.
Pius X School mes ainda mester di yudanza pa cambia nan airconan, y companianan cu kier haci donacion sea cash, of regalando unidadnan di airco, tambe ta bon bini. Aworaki Pius X School tin mester di 25 airco nobo. Ya caba a haya un compania cu a patrocina 1 airco caba, pues ta sigui traha riba e resto. E scol a caba di haya panelnan solar pa yuda cubri gasto di airco.
Aworaki Pius X School tin un team hoben, dinamico, y nan ta basta activo riba tur tereno pa mehora e scol. E scol ta cu ta traha cu sistema adaptivo, y ta unico scol basico na Aruba cu ta funciona segun un sistema asina, cu ta via un plataforma di enseñanza di Hulanda, unda tur alumno ta traha cu un Tablet pa Wiskunde y Idioma. Tur alumno ta traha cu un sistema, unda e materianan ta personaliza. Pues mientras cu e docente ta ocupa, no ta tur alumno ta na mesun nivel, pasobra no tur ta desaroya mes pareu. E ta un sistema cu ta funciona cu e mucha!
