ORANJESTAD (AAN): Diadomingo marduga algo prome cu 3:00 am, un accident basta fuerte a keda registra riba caminda di Tanki Leendert pa Paradera.
E vehiculo a dal contra e borchi grandi grandi di orientacion cu tin banda di caminda, como 95 meter pabao di rotonde di Paradera. E momentum di e impacto, di e golpi fuerte contra e tubo duro aki, a pone cu e parti patras di e Pickup a bay halto, y zwaai como 100º na man drechi.
Despues di a benta full e borchi aki abao, e vehiculo a sigui y bay dal contra un baranca grandi cu tin eybanda, y finalmente den e scual, e Pickup a bay finaliza bunita asina staciona den e parkinglot di Hong Kong Supercenter. E baranca tambe a wordo pusha te riba e parkinglot.
E vehiculo mes a keda destrui! Chassis ta full dobla, cu destruccion fuerte na e parti dilanti, e hood, e motor, y tambe e asnan di wiel.
Testigonan a indica na DIARIO cu prome cu e impacto nan a tende con e Pickup a manera “downshift” masha mahos mes comosifuera e ta tratando di reduci velocidad, y despues parce e chauffeur a baha di caminda y dal violentamente contra e borchi di orientacion. E caminda tabata muha e momento ey.
E chauffeur di e Toyota Hilux Pickup Double-Cab blanco cu number A-37749 despues di e impacto a bandona e lugar di accident. Polis y tambe Forensys a yega na e lugar di accident pa traha nan rapport.
