Alarma ta wordo bati pa aumento gasto pa estudionan avansa
- Hulanda a aumenta interes riba prestamo pa estudio na 2024
ORANJESTAD (AAN)- Cu Hulanda lo tuma medidanan serio pa enfrenta e problemanan financiero na e pais, ta algo cu DIARIO na 2023 na varios ocasion a presenta na su lectornan.
Resultadonan cu e medidanan aki por tin pa Aruba indirectamente, manera semper a wordo mustra, mester wordo tene na consideracion na Aruba, cu riba varios tereno ta wordo afecta pa decisionnan cu wordo tuma na Hulanda.
Pa basta dia e topico ta na discusion pero awor el a bira oficial na Hulanda, caminda studiantenan y futuro studiantenan ta confronta cu e realidad cu nan gastonan pa studia, lo aumenta sigur si nan ta depende di un fiansa di parti di Gobierno pa por cubri e gastonan di nan estudio.
E taza di interes cu Gobierno Hulandes ta aplica pa fiansanan pa estudio, lo aumenta cu cinco porciento entrante 2024 y asina lo bira un peso mas pa e furuto profesionalnan na Hulanda, cu ta pais, cu ta entrega Aruba un cantidad di personal cualifica riba tur tereno pa yena puestonan pa cual no tin suficiente profesional di Aruba.
Publico hopi bez tin problema pa acepta prijsnan cu ta wordo presenta dor di profesionalnan, personanan cu a sigui un estudio avansa, pa nan practica nan trabou.
Den tarifa cu e profesional presenta, tin e sumanan cu mester cubri tur e gastonan cu ta inversion di un profesional, pa e por haci su trabou cu ta exigi material cu e ta uza pero prome cu tur cos, pago di e gastonan cu el a haci pa e por a studia.
Gasto di estudio, cu pa un profesional ta algo cu bida largo ta keda necesario, por ta mucho mas cu hasta loke na prome bista ta importante den e prijs cu un profesional ta presenta ora e ta haci su trabou.
Mientras un profesional semper mester adapta su mes na avancenan riba su tereno profesional, e mester cubri gastonan enorme cu el a haci pa por a studia y pa cual si e mes no tabata tin placa, e mester a haci uzo di sistemanan di prestamo pa asina e por a alcansa su meta.
Ora papia di fiansa y prestamo ta papia di interes, cu ta wordo aplica pero cu den caso di areglonan di gobierno teniendo cuenta cu e interes di e pais, ta keda nulo manera tabata e caso na Hulanda.
E mundo di profesionalnan no ta solamente riba terenonan cu hopi biaha ta bini mas dilanti, pero tambe por ehempel den sector di educacion y sector tecnico.
Pago di e debe di estudio ta uno di e gastonan enorme cu profesionalnan conoce ya cu estudio ta nifica asisti na programanan di institutonan educacional, pero tambe pago di un lugar pa biba como estudiante, pago di cuminda, electricidad, transportacion y tur otro gasto, cu un trahador cu ya tin un entrada, tambe ta paga.
Debe di estudio ta e dolor di cabez financiero grandi di profesionalnan cu den e decision di Gobierno di Hulanda pa aumenta e interes riba fiansa pa estudio, ta wordo directamente afecta for di 2024.
Mayoria na Hulanda ta contra interes riba prestamo pa estudio, cu ta wordo mira como un inversion den futuro di e pais.
Den un tempo di problema financiero riba tereno personal y nacional, aumento ta bira un problema serio for di 2024 y lo mester wordo soluciona pa medio di e prijs cu profesionalnan ta cobra pa nan trabou.
Informantenan a indica na DIARIO, cu Hulanda ta keda directamente y indirectamente un centro di asistencia profesional pa Aruba.
Un gran parti di profesionalnan Hulandes cu ta bin traha na Aruba, lo conoce mas gasto pa nan estudio den futuro.
Nan prijs lo mester subi den tur sector pa cual nan ta wordo atrae. Ademas mester tene na consideracion cu indicenan di prijs comun na cual profesionalnan ta tene nan mes.
Na e momentonan aki ya Aruba hopi biaha ta wordo perhudica dor di e competencia cu sectornan Hulandes ta forma pa Aruba den atraccion di profesionalnan cu por garantisa nan mes un mihor entrada na Hulanda cu un volumen di cliente mas halto pero tambe posibilidadnan mas grandi pa sigui desaroya.
Ora e pagonan pa financiamento di estudio bira realidad como mas peso pa e profesionalnan, lo ta mas dificil pa Aruba pa atrae profesional for di Hulanda, manera expertonan a mustra DIARIO.
