Dahariana Evertsz a splica:
ORANJESTAD (AAN) Den entrevista cu Matutino DIARIO, señora Dahariana Evertsz, Hefe di Seccion Promove Salud di DVG, a duna di conoce cu nan tambe a observa e Dia Mundial di Hipertension, cu a wordo celebra Diadomingo ultimo, 17 di Mei.
Na DVG nan a celebre na pia di trabao como “Health Promotion”, cu tur colega y personanan cu a participa hunto cu nan, p’asina midi nan presion, y haya conseho tocante “Sa bo numbernan”.
Nan a controla presion, sucu, a haya informacion di parti di nutricion, y tambe diferente flyers di FADA, a haci midimento di cintura, haltura y peso, y a duna nan tambe informacion kico esaki ta nifica pa nan curpa, kico ta e cambionan cu nan lo mester haci pa mantene un balansa pa bira saludabel.
Algo cu nan kier implementa, Dahariana a indica, y ta un di e tareanan di “Health Promotion” pa enfoca riba promocion di salud na pia di trabao den DVG mes, mescos cu nan ta haci cu tur hende.
“Pesey tambe ta hopi importante cu nos coleganan a uni cu nos awe, pa haci nan midimento, pa zorg pa nan salud tambe ta bon, pasobra nos ta e cara di salud pa nos comunidad”, Dahariana a señala.
El a agrega cu e salud di hende ta varia den cada ciudadano, y enberdad tin hende cu nan presion ta halto y nan no sa ni mes cu t’asina.
“Algun di nan ta na medicamento y tin biaha nan ta lubida di tum’e, y mi kier pa tur hende corda cu presion ta algo hopi silencioso, cu bo no sa ora bo presion ta halto. Haci bo chekeonan, principalmente si bo ta un persona cu ta consumi hopi salo y sucu. Tambe e parti di alimentacion ta hopi importante. Nos sa cu nos habito di comemento ta varia, pero tin cu wak tambe cu loke bo ta come, si no bebe suficiente awa, si no ta drumi suficiente, si bo estado di stress ta hopi halto, tur esaki ta pone bo na riesgo pa haya hipertension y presion halto”, Dahariana Evertsz a señala.
E ta conseha ora bay docter di cas, corda check bo presion y bo sucu de vez en cuando. “Si bo tin habito di biba mas saludabel, educa esnan mas chikito of adulto mayor. No warda pa bo wordo diagnostica cu bo tin presion halto, p’asina bo tene na cuenta” Dahariana a agrega.
El a expresa tambe cu DVG tin preocupacion cu tin hoben tin presion halto, pero tambe cu nan nivel di stress ta hopi halto, pa motibo cu nan tin examen, cu nan no ta come saludabel, pero como adultonan mester duna nan un bon ehempel, cu si nan come saludabel esaki ta influencia nan di un manera of otro.
