Analisis di 2021 ta suscribi e importancia di Trias Politica pa democracia --- *Integridad di Parlamento na disputa cu eleccion di Benny den prison --- *Eleccion adelanta pa placa cu a desaparece for di fondo di Parlamento
ORANJESTAD (AAN) — Cu e sistema di separacion di poder, Trias Politica, ta e base efectivo pa garantisa un Gobierno democratico cu ta traha na interes di Pueblo, a keda demostra na 2021.
Analisis di 2021 ta confirma e importancia di Trias Politica pa e sistema democratico, cu ta exigi pa Pueblo por confia personanan cu ta wordo eligi durante eleccionnan secreto pa representacion di Pueblo riba nivel gubernamental.
Mundo politico di Aruba a conoce un saldo sumamente tristo na 2021, ora diferente caso di corupcion a bira noticia mas importante di e pais.
Integridad di personanan cu mester maneha e pais na nomber di Pueblo a bira sumamente cuestionabel durante 2021, ora Pueblo mester a bay urna electoral pa dicidi riba e realidad gubernamental y politico di Aruba.
Ya 2021 a habri cu cantidad di casonan den desaroyo. Sinembargo, Aruba no tabata conoci cu e hecho cu eleccionnan na Aruba mester a wordo adelanta pa motibo di e hecho cu e Vice Presidente di Parlamento, Alan Howell a wordo sospecha y persigui dor di Husticia pa ladronicia di placa di Parlamento.
Gobierno Wever-Croes a cay ora Ministerio Publico a anuncia cu Howell di e fraccion di POR, ta wordo investiga pa e sospecho cu el a mishi cu fondonan di partido POR den Parlamento.
Ta trata aki di un fondo cu e partido tabata ricibi pa e por haci su trabounan den Parlamento.
Prome Ministro Evelyn Wever-Croes a splica cu e no ta acepta pa e Gobierno wordo carga dor di Alan Howell y a entrega retiro di Gobierno y asina eleccion nobo mester a tuma lugar.
Eleccion cu a bira historico pa motibo cu partido AVP a dicidi cu e ta pone Benny Sevinger riba su lista a pesar di e hecho cu Benny Sevinger tabata den prison, acusa di entre otro corupcion den asunto di tereno, conoce como caso Avestruz.
Benny Sevinger a wordo eligi como Miembro di Parlamento di Aruba durante su estadia den prison, pero no por a asumi su responsabilidad debi na e problema serio cu esaki lo tabata.
Si Benny Sevinger a wordo huramenta como Miembro di Parlamento, Prison lo mester a percura pa guardia ta presente den Parlamento cada bez cu Benny Sevinger presenta.
E caso di Benny Sevinger lo sigui na 2022 y lo hiba otro acusadonan tambe dilanti Huez.
Abogado di Sevinger mes a indica cu algo a pasa y cu e caso tin motibo pero a bisa cu Benny Sevinger a bira victima di hende cu el a confia.
E caso aki no tabata unico den un situacion cu a urgi sigur pa atende cu integridad di politiconan activo como representante y gobernante di Aruba.
Caso Refineria di Aruba a subi mesa cu acusacionnan serio contra desaroyonan tempo di atraccion di Citgo durante gobierno Mike Eman.
E rapport cu a wordo traha riba e desaroyonan aki ainda ta den man di Huez Comisario.
Mientrastanto mester wordo dicidi kico lo pasa cu e ex Ministro di AVP, Paul Croes cu a scucha confirmacion di Husticia cu e ta culpabel.
2022 lo hereda un cantidad di caso cu ta pendiente entre nan e caso Aloe, cu a haya nomber nobo di parti di Ministerio Publico.
Sala di Corte di Husticia tambe a conoce cantidad di caso politico civil basa riba interpretacionnan di ley di eleccion, cu a produci sentencianan cu nos lo atende den proximo edicion.
