“Pensionadonan ta den pobreza”
ORANJESTAD (AAN): Diaranzon atardi durante un conferencia di prensa, e Gremio- y Sindicatonan a demostra cu nan a uni, y a divulga cu dia 1 di Februari 2023 caba nan a manda un carta pa Gobierno y Februari a finaliza y no a haya ningun contesta riba esey.
Pa e motibo aki, e Gremio- y Sindicatonan aki a dicidi na bay publico pa informa pueblo di e grupo aki, y e desaroyonan cu nan ta mirando.
Un di esnan cu tambe a uni nan voz na e malcontento aki, ta Organizacion di Pensionadonan Publico Arubano, esta OPPA.
President Ivo Valdes a confirma cu e pensionadonan na Aruba ta rabia. “Nan ta hopi rabia”. E no ta referi djis na e aumento di awa y electricidad, y e hecho cu nan tin di paga awor pa nan remedi.. tambe nan ta rabia pasobra pensionadonan ta sigui haya cobranza atraza di Impuesto, y cu nan tin di paga den un solo termino.
E asunto di remedi tambe tin e pensionadonan rabia! Si bo bay supermarket, bo ta mira prijsnan cu di un dia pa otro ta cambia.
“Nos ta propagandá nos mes como un One Happy Island... Puntra e hendenan cu ta biba aki riba si berdad nan ta happy. Esey ta un encuesta cu lo mester haci pa check con feliz e hendenan di Aruba ta.”
Segun Valdes, si bo ripara cu e comerciantenan, esnan di sector hotelero, y e sindicatonan mes ta pasa hopi trabao... imaginabo e pensionadonan publico y sin lubida e cantidad grandi di pensionado cu tin un solo pensioen.
“Riba dje, awa a subi, coriente a subi, y nos tin di paga pa nos remedi tambe,” Valdes a bisa. “Asina mes cu nan como pensionado publico ta paga suma halto na prima, nan tin di paga pa remedi y esey ta un abuso.”
OPPA a bisa cu pa dos aña tras di otro, Gobierno a kita 50% di nan gelijkbedrag di fin di aña. Diferente carta a wordo manda pa Gobierno, pero no ta haya contesta. Siendo cu OPPA kier sinta na mesa!
E placa cu nan a kita ey, no ta un placa cu ta ‘regalo’. E ta un debe cu Gobierno tin cu e pensionadonan.
Mirando e preocupacion di tur gremio, e ta kere cu Gobierno mester cuminza haci algo si, pasobra Aruba a bira caro y pensionadonan ta den pobreza.
