Comosifuera Gobierno ta loco pa placa
ORANJESTAD (AAN): E siman aki, a bin circula e informe cu varios Pensionado riba e isla a bin ta ricibi un serie di cobranza hunto di Departamento di Impuesto, pa sumanan astronomico.
Ta trata aki di Aanslag di 5 diferente aña cu ta wordo poni hunto den un solo cobranza riba schouder di e pober Pensionado. Envez cu den pasado a manda Aanslag pa cada aña separa cada tanto tempo, pa motibo misterioso DIMP a warda te awor pa pone nan hunto, y daña beis di asina hopi ciudadano na Aruba.
Fuentenan den organizacion di Pensionadonan na Aruba, a splica cu nan tambe a bin ta notando esaki. Den nan opinion, esaki ta socede djis debi cu Gobierno mester di placa, y nan “ta cobrando manera loco”. Y nota ni preocupa cu ta azota Pensionadonan di e forma cruel aki.
“Esnan di Departamento DIMP ta fout di no a manda e cobranzanan aki mas trempan y separa. Pues cu e pensionado no a paga antes, ta eror di DIMP mes,” a ser splica na DIARIO.
Awor ta unda nan kier pa Pensionadonan cu no tin ningun otro entrada mas, bay paga un suma asina astronomico den menos di dos luna. Ya casi e placa di pensiun ta ni yega pa paga aseguro di auto, coriente, awa, cuminda, y demas costo halto di bida.
Ta bolbe sinti cu net e Pensionadonan cu a traha duro durante nan bida pa yuda economia y progreso di Aruba, awor ta bira ‘de dupe’ y tin di haya un golpi asina amargo pa cortesia di Departamento di Impuesto. Esaki ta nada social y sigur ta pone hende cuminza pensa cu di berdad Gobierno y Ministro di Finanzas ta cueste loke cueste tras di placa, sin importa nada ta kende ta e ciudadano perhudica.
E organizacion di Pensionado a splica cu nan sa cu tin varios Pensionado cu a logra haya un areglo hopi suave di pago na Departamento di Impuesto, di como 100 pico Florin pa luna pa asina paga esaki. Nan ta spera cu Departamento di DIMP keda mantene e tipo di areglonan aki cu lo no cay duro riba e pensionado.
Pero e hecho cu Departamento di Impuesto ta hisa benta asina hopi aanslag riba e pober Pensionado, ta algo di cuestiona y sigur nada bunita den bista di pueblo.
