E ta pa tur of pa esnan cu tin un trabao acerca no?
ORANJESTAD (AAN): Tin pensionadonan di SVb (AOV) cu a keda un tiki confundi, cu e declaracion di Minister di Economia y Finanzas, tocante e 250 Florin di reparatie toeslag, cu gobierno a priminti nan tur.
Esaki ta pa na un principio nan a interpreta comosifuera ta tur pensionado cu ta haya un pension di behez di AOV, ta bay ricibi e suma aki. Pero Minister a menciona den su entrevista, cu esaki lo drenta na vigor dia 1 di Mei, pero cu nan ta bay haci un “inkomentoets” kiermen un evaluacion di e entradanan di e pensionadonan pa wak ken, berdaderamente, mester di e beneficio aki, y ta asumi cu ta esnan cu no tin un trabao acerca so lo hay’e locual ta full otro cu loke a ser bisa prome pa prome minister.
En todo caso, e pensionadonan cu tin un entrada banda di e pension ta pasobra nan a busca trabao debi cu nan pension ta abao (menos cu 700 florin) y ningun hende por sobrebibi cu esey.
E pensionadonan ta desea si minister por ta mas specifico y aclarea e intencion, pa nan sa di awo caba si nan por conta cu e 250 florin of no. E pensionadonan cu ta traha a paga hopi placa na impuesto (loonbelasting y AZV) pa motibo di a haya un salario modico, banda di nan pensioen di behez (no pensioen di APFA).
Nan ta desea pa e minister aclara esaki tambe via prensa, y compronde cu no ta trata di un critica politico ni mucho menos, sino simplemente di algo logico y cu nan sinti cu tambe nan merece.
