Regreso na normal cu exigencia pa periodismo local y mundial --- *Lama semper a ocupa un lugar importante pa economia di Aruba --- *E peliger di mal maneho di sector petrolero Venezolano pa Aruba
ORANJESTAD (AAN) — E pandemia Covid-19 a kita atencion for di hopi asunto sumamente importante cu na 2021 mester a wordo atende na mundo.
Desaroyonan cu a wordo atende durante e prome decada di Siglo 20, a keda pendiente na momento cu hende mester a lucha pa su bida contra e Coronavirus nobo.
Regreso pa normal ta nifica tambe pa periodismo local y internacional duna contesta na exigencianan importante na un momento sumamente importante pa henter mundo.
Tabata for di prome cu entrada di e Coronavirus nobo, cu DIARIO a cuminsa prepara Aruba pa temanan importante cu lo a exigi tur atencion despues di 2020 a base di paketenan cu a wordo prepara pa cambionan y retonan di e comunidad mundial.
Na Aruba, Covid-19 a topa cu e momento cu regimen Nicolas Maduro mester a haya atencion pa e peliger cu e ta presenta riba diferente tereno regional.
Awe Aruba mester bolbe presta atencion na asuntonan cu no solamente ta mara na e resultado directo di politica dictatorial cu menasa subversivo pa e region.
Uno di e resultadonan serio di maneho di e industria petrolero Venezolano dor di Chavismo tabata, e forma cu a mira solamente e bienestar di saca placa for di e sector petrolero y a ignora asuntonan cu lo a bira peligroso pa Venezuela y pa henter e region.
Mancha di azeta a haya publicidad na Aruba na momento cu e peliger tabata presenta su mes.
E atencion pa e desaster ecologico cu Chavismo ta causa a kita pero mester bolbe haya atencion como pakete total di e defensa di naturalesa cu ta base pa sobrevivencia di e ser humano.
Kico medio ambiente ta haci cu hende, ta un asunto cu dump na Aruba ta revela y DIARIO tin tur atencion pa e tema aki na Aruba, cu a gasta sumanan enorme pa “go green” pero no a mira e necesidad di un solucion pa e enemigo di hende y naturalesa na Aruba, cu ta dump.
Ta den cuadro di e necesidadnan pa medio ambiente di Aruba, DIARIO ta atende tambe cu e peliger grandi di polucion di lama cu e industria petrolero descontrola di Venezuela, ta presenta.
E loke na Venezuela ta wordo cualifica como “cultura Chavista” y segun rapportnan oficial tambe corupcion, a haci cu refinerianan na Venezuela a bira fuente di peliger pa e ser humano.
No tin atencion pa mantencion necesario di e refinerianan cu ta conoce explosion y peliger serio pa e forza laboral, cu pa un parti importante, a busca trabou pafor di Venezuela.
Un desaster ta wordo crea pa naturalesa dor di Nicolas Maduro, cu no ta hinca placa den e prevencion necesario pa evita polucion serio di lama den region di Caribe.
Esaki ta nifica cu un zona cada bez mas grandi na e costa Venezolano, ta wordo afecta dor di polucion, loke ta afecta e bida bou lama.
Informacionnan clave cu DIARIO a cuminsa ricibi ta indica, cu e peliger cu ta wordo crea dor di industria petrolero di Venezuela pa Zuid di Aruba, ta crece.
Pesca ta un entrada importante pa economia di Aruba, manera historia ta indica . E ta uno di e sectornan na peliger pa no papia di e peliger creciente di manchanan di petroleo pa Aruba.
E ambiente den cual hende mester biba den futuro y lo ta parti di e herencia total cu ta entrega na futuro generacionnan, tin atencion total di DIARIO cu ta sigui traha riba compilacion di tur informacion riba e tereno aki.
