ORANJESTAD (AAN): Tur luna, Pastoral Hubenil Aruba (PHA) ta organisa un evento pa su miembronan y hubentud en general.
Pa luna di april, e actividad ta diabierna 26 di april proximo y PHA lo tene un Caminda di Luz Hubenil den misa di Birgen di Fatima na Dakota. Durante e Caminda di Luz of Via Lucis, nos ta recorda e aparicion y momentonan cu a pasa despues di resureccion di Hesus.
Si nos a compaña Cristo Hesus den su Caminda di Cruz pa salba nos, awor nos mester sigui compañ’E den su Caminda di Luz, den su glorificacion, den su manifestacionnan mas importante entre su Resureccion y binida di Spirito Santo, pa yuda nos crece den djE. E ta e Luz, cu a bini den mundo y ta ilumina tur esnan cu ta biba den e mundo aki y esnan cu a acept’E. El a duna nan e poder di bira yiunan di luz. Asina tur esnan cu ta kere den djE, no keda den scuridad.
E CAMINDA DI LUZ ta un reflexion riba Cristo Hesus su Resureccion!
E programa di diabierna venidero na parokia di Dakota, ta manera ta sigui:
Caminda di Luz: 6:30 – 7:00 pm
Santa misa: 7:00 – 8:00 pm
Pa socialisa: 8:00 – 10:00 pm
