ORANJESTAD (AAN) – Den conferencia di prensa di gobierno, diahuebs di e siman aki, Minister di Husticia Rocco Tjon, a referi tambe na e “Family Justice Center”.
E mandatario a comenta cu siman cu a pasa el a reuni cu e ekipo cu ta percura pa e “Family Justice Center” bira un realidad na Aruba.
“Mi mester bisa cu ya pa hopi tempo caba nan ta trahando y haciendo un tremendo trabao, pa cu esaki. Manera ta conoci e ‘Family Justice Center’ ta un centro caminda cu experticia ta bin hunto, pa asina por atende cu casonan, entre otro, di abuso sexual. Full Gabinete Wever-Croes ta para tras di e proyecto aki, y pesey nos a boga tambe pa e forma parti di e presupuesto 2022, y esaki ta wordo comunica tambe na e ekipo”, e dignatario a bisa.
El a agrega cu ya caba pa 8 y 9 di December, lo tin e prome curso na Aruba unda un compania di Hulanda ta bin brinda esaki, y nan lo percura pa tur recherche cu ta traha den Jeugd en Zedenpolitie ta certifica den interogacion di mucha, segun normanan internacional. Pues, esaki ta bay haci posible cu e caso cu ta wordo presenta dilanti un huez ta mucho mas solido.
E mandatario a splica cu e curso no a keda limita solamente na JZP, pero tambe a incorpora psicologonan cu ta traha den henter e cadena manera Voogdijraad, Centro Orthopedagogico, Directie Sociale Zaken, entre otro, y Ministerio Publico cu tambe ta hopi importante; e fiscalnan ta bay forma parti di e curso aki.
Tjon a agrega cu manera ta conoci OM tin dos Zeden Officier, y e ta kere cu den e forma aki ta bay presenta un caso mas solido pero di otro banda e Fiscal por defende e caso hopi miho.
E dignatario a agrega cu tambe ta hopi importante cu su Ministerio ya a cuminza cu e proceso pa adkiri full e camaranan nobo pa pasa e interogacionnan, tambe segun normanan internacional.
Esakinan ta pasonan concreto cu ta wordo tuma for di Ministerio di Husticia, en todo caso, no solamente den e parti di prevencion pero tambe den e aspecto di represion, pa por atende cu e casonan di abuso sexual.
