El a yega cu monton di cocaina
ORANJESTAD (AAN): Informacion cu Polis a suministra, ta indica cu Diasabra atardi a detene un homber na Aeropuerto Internacional Reina Beatrix.
Durante control di Douane a pone man riba e pasahero masculino di inicial T.R.R.R.L., di 22 aña di edad naci na Curaçao. Nan a haye cu droga den su poder, na su yegada na Aruba.
Mesora nan a pone Unit Narcotica di Cuerpo Policial na altura na unda cu nan a haci e detencion di e sospechoso.
E sospechoso a trata di drenta cu cocaina, y na su yegada tabata actua hopi sospechoso. Esey a pone cu Douane a mik riba dje, y e miembro atento di Douane a gare. No ta descarta cu lo por tin mas detencion den e caso aki.
Cuerpo Policial ta haci un apelacion pa abo cu a wak of sa algo pa yama e tipline di polis cu ta 111-41. Bo informacion ta importante pa nan y bo anonimidad ta keda garantisa.
