Cu vision nobo, Liderazgo fuerte y un direccion strategico renoba
ORANJESTAD (AAN) Pafo di Parlamento, RAIZ ta cla pa ta e bos di e mas di 10.000 votador cu awe no tin representacion den Parlamento di Aruba.
Despues di un periodo di reflexion cu proposito, despues di eleccion na 2024, RAIZ ta orguyoso di por anuncia su regreso den e panorama politico di Aruba, respalda pa un vision nobo, liderazgo fuerte y un direccion strategico cu ta posiciona e partido pa logra impacto a largo plazo.
Den e ultimo seis lunanan, RAIZ a scoge un camina di reflexion, no pa retira, sino pa tuma e responsabilidad di reevalua, reorganiza, y fortalece su vision pa e futuro di e partido pa por sirbi Aruba.
E siman aki, durante e prome reunion di miembro (algemene ledenvergadering) RAIZ a drenta su capitulo nobo, transforma di un plataforma, pa un partido cu un mision y structura fuerte.
Liderazgo renoba, Raiznan mas fuerte: Rondona di miembronan di RAIZ, unanimamente, señor Anthony Martina, como Presidente nobo di e Hunta di Directiva di RAIZ, successor di señor Jeffrey Matos, kende a sirbi como Presidente di 2022 te cu 2025 y cu awo ta muda pa Hulanda.
Partido RAIZ kier extende un danki di curazon na señor Jeffrey Matos pa su dedicacion, compromiso y pasion den e ultimo añanan. Tambe unanimamente, a instala e directiva nobo, kende hunto cu señor Martina, lo dirigi RAIZ den su proximo capitulo.
Na mes momento, RAIZ ta confirma e reeleccion di señor Ursell Arends como lider politico di RAIZ. Cu un reputacion fuerte di lidera cu integridad berdadero, y innovacion durante su tempo den gobierno, Arends ta orguyoso di e logronan cu a cumpli cu ne, cu awe ta sirbi como fundeshi pa otro sigui traha riba dje. Decisionnan dificil pero cu bienestar di Aruba semper na pecho.
