Parlamentario di AVP, John Hart:
ORANJESTAD (AAN): Parlamentario di AVP, Sr. John Hart, hunto cu sosten di varios otro miembro di Parlamento, a solicita formalmente un reunion na Presidente di Parlamento pa trata e situacion actual di holor na Parkietenbos, asina tambe e rol di Aruba Wastewater Sustainable Solutions (AWSS) y e desaroyonan relaciona cu e asunto aki.
Recientemente, habitantenan di Cas Paloma y e vecindario rond di Parkietenbos a expresa nan preocupacion y a presenta kehonan tocante molester di holor fuerte den nan comunidad. Segun informacion suministra door di Aruba Wastewater Sustainable Solutions (AWSS), e molester di holor ta causa en parti pa sludge (slib) cu no ta seca suficiente despues di e proceso den e planta di purificacion na Bubali.
Debido na trabaonan di mantenimento cu ta tumando luga actualmente, e sludge ta contene mas awa cu normal ora cu ta transport’e pa Parkietenbos. Consecuentemente, mester comprimi adicionalmente e material cu ta yega na e planta na Parkietenbos pa saca mas awa posibel, pa asina logra un estado mas seco. Sin embargo, e instalacion na Parkietenbos ta un planta anticua y habri, locual ta contribui na e emision di holor, principalmente proveniente di e awa cu ta separa for di e sludge, cu normalmente lo a yega eynan caba den un condicion mas seco.
Parlamentario Hart a indica cu e a tuma nota cu representantenan di Utilities, AWSS y e Minister di Energia ta presta atencion serio na e situacion y cu nan a comunica repetidamente tocante e pasonan cu ta tuma y e esfuerzo pa completa e mantenimento mas lihe posible. No obstante, segun Hart, e preocupacion di e comunidad ta legitimo y mester dun’e prioridad.
“Mi a tuma nota cu representantenan di Utilities, AWSS y Ministerio di Energia tin atencion pa e asunto aki y cu nan a comunica di biaha kico ta e pasonan y cu nan ta trahando riba solucion pa termina e mantenimento mas lihe posible. E preocupacion di e habitantenan ta serio y mi ta kere cu nos mester traha riba solucion structural y duradero.
Fuera di e parti tecnico di AWSS y e incinerator, na final di dia nos ta tratando akinan asuntonan cu tin di haber cu salud publico di nos habitantenan, y mi ta di opinion cu e ora a yega pa Parlamento di Aruba haya claridad riba e pasonan pa dilanti,” Sr. Hart a enfatisa.
Cu e solicitud pa un reunion parlamentario, Hart ta busca pa sigura cu Parlamento di Aruba por haya un panorama completo di e situacion actual, e medidanan cu ta tuma y e solucionanan structural cu ta necesario pa preveni ripiticion di e problema den futuro, siempre cu e bienestar y salud di e comunidad como prioridad principal.
