Edgard Vrolijk ta mustra cu mester hisa nivel di Parlamento
ORANJESTAD (AAN): Presidente di Parlamento, Edgard Vrolijk, a duna di conoce cu pa loke ta tratamento di Presupuesto, tur hende ta haya un luna pa prepara. Den e luna ey ta haci pregunta y por prepara un bon discurso y si den un luna no por prepara un bon discurso e ora esey no ta bon.
Eynan ta unda e ta kere cu semper tin parlamentarionan ta rabia cu ne ya cu ta duna nan espacio pa prepara y nan no ta hacie. Semper e ta haci apelacion na su coleganan pa prepara y presenta un bon discurso y pa no cay den e wega politico y pa no desvia, a bisa.
Vrolijk a laga sa cu tambe hopi parlamentario ta kibra regla cu nan conoce y esey ta haci e reunionnan fastioso. Por ehempel, un punt van orde. No por stroba un hende di papia pasobra esey ta mal manera. Mester warda pa un hende caba di papia pa pidi un punt van orde.
Presidente di Staten a referi na e falta di profesionalismo tambe ora ta haci expresionnan cu no ta na nivel di Parlamento.
Esey ta e cosnan baho cu mester evita y cu pueblo tambe mester condena pa stop. Parlamento ta e luga pa mas mal ehempel pa 'bullying' di Aruba y hopi mayor ta wak e 'bullying' ey cu ta pasa den sala, a expresa.
Si comunidad cuminsa bisa cu kier un cambio, e cosnan ta cambia y no ta wak e como enemigo, a manifesta.
