Parlamentario Ricky Hoek di fraccion di MEP:
ORANJESTAD (AAN) – Parlamentario Ricky Hoek, a elabora den conferencia di prensa di fraccion di MEP, tocante e “Landsverordening Normering Topinkomens” cu pronto Parlamento di Aruba ta bay trata. Ademas el a referi na e maneho di idioma, cu Minister di Enseñanza a bin cune, y pa cual a introduci un Comision.
Hoek a relata cu Diaranzon, e Comision concerni di Parlamento, a sinta cu e ultimo dos stakeholders cu ta Banco Central y ATA, pa loke ta trata e ley di “Normering Topinkomens”, cual ta un ley hopi importante.
Hoek a bisa cu despues di varios reunion cu e diferente gremionan y companianan estatal, pa scucha cual nan opinion ta, pa Parlamento tambe por haya un opinion y un bista cla pa loke ta trata e aspecto aki di salario.
Hoek a indica cu desde cu Hulanda a impone e Landspakket ta tarea di Parlamento tuma e ley aki hopi na serio, pasobra ta trata di entradanan di top funcionarionan, hefenan grandi di maneho, management teams, di companianan estatal cu tin salarionan basta halto.
Loke e ley ta stipula ta cu nan kier trece igual cu un salario di un Minister Presidente, den e caso aki di Minister Wever-Croes. E parlamentario a splica cu pesey tambe nan ta yama e ley “LNT” pero tambe nan ta papia di e “Wever Croes Normering”. Parlamentario Hoek a subraya cu añanan atras, na Hulanda, esaki a tuma lugar caba, na Sint Maarten tambe e ley a wordo trata caba, y Curacao tambe lo sigui trata e ley aki pasobra tambe nan lo mester implement'e.
El a bisa cu por a wak cu e aspecto di salario ta hopi importante ora di recluta profesionalnan den e organizacion pero tambe mantene nan, y ademas wak ki efecto esaki tin riba e otro empleadonan.
Hoek a señala cu esaki ta un tarea sumamente delicado, pasobra fraccion di MEP no ta completamente di acuerdo cu e ley aki, den su totalidad manera e ta, pero naturalmente Parlamento ta bay trate y wak cual ta e miho maneho cu por tuma, pa asina ora di tuma decision e ta un “win win situation” tanto pa e companianan estatal como pa Pais Aruba.
Den e caso aki, haciendo un specificacion, Hoek a splica cu e ley ta bisa cu e top funcionarionan aki, mester gana un salario minimo anual di 271.000 florin, pero hopi di nan, actualmente, ta surpasa e limite aki. Hoek a subraya cu ta un balansa Parlamento ta buscando, y ta importante pasobra nan no por yega sin mas pasa e ley corta sin mas e salario di e funcionarionan concerni.
