Ley di Contabilidad ta basa riba loke Gobierno Wever-Croes a alcansa
*Crea debe ta un delito cu hamas por bira fuente di inversion di pais
*Florin di Aruba ta fundeshi cu Betico Croes a logra cu Status Aparte
ORANJESTAD(AAN)—Na momento cu Parlamento di Aruba a reuni pa papia riba un proposicion pa cambia e debe nacional di pais Aruba, miembronan di Parlamento cu a sostene e ultimo creacion di Mike Eman, a trapa cu dos pia riba e Ley di Contabilidad, cu ta e arma legal di defensa di placa di Pueblo y di e Florin Arubano, cu ta fundeshi di Status Aparte manera Betico Croes a exigi.
E dos exigencianan grandi den e negociacionnan di Status Aparte, cu mester a conduci na felicidad di e Arubiano na su pais, tabata cu Aruba lo tabata tin su propio moneda y Banco Central y cu Aruba tin su propio Ministerio Publico.
E felicidad di un Pueblo ta depende di e situacion financiero y economico di e pais cu por entrega e Arubiano e esencianan basico di un bida aceptabel. Esaki ta encera cu Aruba no por wordo someti na ningun influencia, cu ta destrui e base financiero y economico di e pais of ta stroba e produccion financiero y economico alcansa Pueblo.
E otro exigencia di Aruba tabata pa e tin su propio Ministerio Publico pa evita cu e Arubiano por bira victima di leynan cu ta destrui e libertad di e Pueblo Arubiano di goza di democracia, cu ta garantisa cu tur ciudadano cu ta tene nan mes na ley, no por wordo persigui pasobra e no ta di acuerdo cu cualkier ramo di gobernacion di e pais.
Bienestar di un Pueblo ta depende di e bienestar financiero di e pais, cu no ta bienestar di un grupito na poder y nan amigonan, manera den e caso Avestruz oficialmente a keda entrega na historia di Aruba!
Pa evita cu abuso por wordo haci cu placa di Pueblo, tin e Ley di Contabilidad, cu ta splica exactamente con cada cent y propiedad di Pueblo mester wordo maneha.
For di e prome momento di Status Aparte, ora partidonan cu tabata contra e Status Aparte di Betico Croes, a uza e lucha di Betico Croes pa nan haya poder, Reino Hulandes a lanta para contra e wega cu garantianan, cu placa di Pueblo cu cual e prome Gobierno Arubano forma pa AVP cu tabata contra Betico Croes, a pone Florin na peliger.
Aruba tabata un pais baby recien naci, ora e prome wega cu placa di Pueblo di Aruba a tuma lugar bou maneho di AVP, cu despues a briya den e caso Fondo Desaroyo Nobo San Nicolas, cu imediatamente despues di e scandal a mira surgimento di Mike Eman cu a uza destruccion di Florin Arubano cu mitar BBO!
E forma con Mike Eman mes despues mester a splica Pueblo cu e no por a elimina BBO sin mata Aruba financieramente, ta papia un palabra cla di e bochorno actual, den cual Mike Eman kier deshaci di e efecto di scandalnan bochornoso di su gobiernonan, cu a percura pa casonan penal bergonzoso pa Aruba pero tambe den debenan cu Pueblo di Aruba mester paga mientras Mike te awe a percura pa Benny Sevinger cu Huez a manda prison, gana placa di Pueblo den Parlamento.
E Ley cu ta sostene democracia y ta splica con cada cent di e pais y di e Arubiano mester wordo gasta, ta aplaudi cu awe Aruba porfin a logra su Status Aparte cu cifranan den cual entrada di Aruba ta mas halto cu su gastonan.
Ningun Miembro di Parlamento, cu mester defende e Ley di Contabilidad cu ta central den e Derecho di Budget di Parlamento, por sostene e proposicion di Mike Eman pa cambia e debe cu a bira e logro grandi di gobernacionnan di Mike Eman, den inversion di e pais.
E plannan di Mike Eman awe menos cu nunca por ta aceptabel pa Parlamento cu mester dicidi pa Pueblo di Aruba, cu na 2023 a wordo cubri cu berguensa y mas berguensa den e forma cu den sala di Corte, a wordo splica kico tabata corupcion en pa e Family and Friends di Mike Eman.
Husticia y bienestar di Florin Arubano tabata central den e lucha Arubano, cu awe ta culmina cu logronan di Gobierno Evelyn Wever-Croes, cu mester a pone fin na e Era di Piñata cu placa di Pueblo di Aruba durante gobernacion di Mike Eman, cu awe kier bay inverti e debe cu el a laga como herencia pa Pueblo di Aruba.
Con Parlamento, cu mester defende Ley di Contabilidad, por sikiera reuni pa discuti e sugerencia di Mike Eman, cu casi a mata Florin, ta e pregunta mas grandi cu Parlamento ta entrega na 2024!
