Karina Engelberg di Comision Defensa di Mucha:
*Como representante y bos di pueblo
ORANJESTAD (AAN)—Desde aña 2019 caba, e Comision na Defensa di Mucha a haci un investigacion extenso encuanto henter e proceso di “A Child Protection” pero falta masha hopi ainda pa e Comision yega unda e kier ta, pa cu derecho, defensa y proteccion di muchanan.
Asina Karina Engelberg, di Comision na Defensa di Mucha, a duna di conoce. El a bisa cu aworaki, den temporada di carnaval, nan a wak hopi cos. El a comenta cu como Comision, nan ta scucha esnan cu kier duna nan aporte, y nan ta para pa locual ta saludable pa nos comunidad, y cu nan kier trece dilanti.
El a splica cu nan ta na 25% di unda nan kier yega, pa e proteccion di nos muchanan. Pero den henter aña ta bon pa nan tin e muchanan na bista pasobra nan ta e futuro generacion.
Na Aruba tin varios fundacion cu ta traha pa mucha, y segun Karina Engelberg ta importante pa nan traha hunto. Un punto hopi importante ta pa bin cu un “sistema di tata” cu ta esun cu ta colecta informacion di diferente instancia, teniendo cuenta cu privacidad di tur hende, locual ta hopi importante, unda cu por saca un resultado di cual ta e top diez prioridadnan pa e muchanan na 2024, pa bin cu cambionan den e maneho y tambe pa trece den ley posible, y tambe pafo di Corte, cu tambe tin un rol.
El a bisa cu un samenwerking, un combersacion habri di kico ta pasando na Aruba, kico e instancianan ta wak, y kico ta e consecuencianan di kico ta pasa na chikito y kico ta e resultado na grandi.
Riba esaki tin hopi investigacion, internacionalmente, cu hasta e Comision a compara e datonan y hasta por aconseha gobierno y si algo a funciona den exterior kizas por adapt’e na Aruba. “Por ta pone den nos contexto pa nos duna nos mes mas trankilidad, na e mayornan y comunidad henter”, Karina a comenta.
El a agrega cu e mes ta den shock di locual el a scucha y mira, por ehemplo pa loke ta Jouvert Morning y carnaval en general. Parlamento, como representante y bos di pueblo tambe, tin un rol hopi grandi den esaki, e mester ta mas pro-activo y “agresivo” den locual ta e tema aki tambe.
E comision ta enfoca riba abuso sexual di mucha, pero abuso en general nan no por laga afo, pasobra na final e muchanan mester tin e ayudo pa ta e mayornan conciente y responsabel di mañan.
