Identidad di e ser humano a bira ala nobo di base comercial mundial
- Un ala basico di Inteligencia Artificial ta destrui bida priva di ciudadano
- Mundo moderno ta entrega pakete nobo y exigente na circulo politico
ORANJESTAD (AAN): Na un forma of otro e articulo aki, lo por worde uza door di sistemanan moderno cu ta gana placa cu acumulacion di informacion riba comportacion di hende den uno di e negoshinan mas productivo di actualidad.
Cuanto biaha un persona ta worde acerca door di instancianan cu ta pidi pa e duna cierto informacionnan riba su comportacion basico?
Asina yama encuesta ta worde haci ariba e cantidad di awa cu hende ta bebe pa dia te e orarionan cu e ta pasa den publico pero tambe den su camber.
Facebook a bira un tesoro scondi pa companianan cu ta biba di informacion cu ta worde presenta continuamente door di hende cu kier mata pa su derecho ariba privacidad pero na mes momento ta entrega publico mundial tur informacion personal.
Comunidad mundial no mester di bleki pa bati mas. E tin sistemanan mucho mas poderoso, cu ta acumula tur informacion di hende y ta procesa esaki pa bira benta di informacion cu ta sumamente importante den mundo comercial.
Comunica via computer a bira un fuente di informacion cu ta reemplaza sistemanan di antes caminda empresanan y investigadornan riba tur tereno tabata acerca hende personalmente pa pidi nan informacion personal pa asina nan por ahusta e servicio cu nan ta presta na comunidad.
Di e forma aki tambe por establece, kico un persona ta desea y no ta desea di un politico, cu ta keda secreto, pero ta uza tur e informacionnan cu e ta ricibi pa asina yega por ehempel na un programa politico, cu cual e ta gana eleccion.
E avancenan intelectual a haci cu ya no mester di hende special pa acerca publico y pidi informacion ya cu simplemente ta haci uzo di internet pa ricibi informacion di hende y uza esaki pa propositonan cu por worde considera den hopi instancia como proposito dudoso.
“Cuki” antes tabata un regalo sabroso y un arte special cu tabata pasa di un generacion pa otro den cushina.
Awor “cuki” ya no ta worde traha den cushina. Cuki ta informacionnan cu ta worde saca for di participacion di un persona na e mundo computerisa.
Pues informacion personal di un persona ta worde malusa di loke ta yama “cookies”, pues cuki, cu ta colecciona tur informacion personal di un persona cu ta worde pasa via di e sistema computeriza.
Ta masha bunita con ta atende cu e asunto. Den bida normal a bira cu un persona sin un computer of telefon cu ta comunica na tur forma cu henter mundo tin un loke ta worde considera problema grandi pasobra hasta pa su cita pa dokter, e mester uza computer.
Ora e yega na cierto usuarionan (site) den e computer, e ta worde puntra si e ta permitie cuki. Hopi hende no sa mes kico ta e cuki cu ta ofrece nan na Ingles y simplemente ta bisa “yes” pa e solo motibo cu si bo bisa “no” bo ta den problema.
Despues cu na varios pais a atende cu e ladronicia serio di informacion personal, a cuminsa introduci diferente tipo di informacion personal cu e usuario di computer, ta permiti pa worde colecta.
Pa ta hopi franco den mayoria di caso, e escogencia cu ta worde presenta, ta asina complica, cu hende pa yega na e sitio cu nan kier bay , ta primi yes pa porta no cera.
Computer di un persona asina ta biba cu un cargamento pisa di entidadnan invisible cu ta haci uzo di nan informacionnan personal, cu ta worde uza den negoshi cu ta procesa y bende informacionnan cu ta worde colecta pa medio di computer.
E privacidad di un persona ta worde afecta pero esaki ta nifica tambe cu personanan y entidadnan criminal tambe por acumula informacion valioso pa medio di loke ta ariba internet.
Si tene cuenta con ladronnan di informacion cu ta worde yama “hacker” ta uza un portret di un persona pa crea cantidad di personalidad falso den un rato, por mira problemanan serio cu ta surgi cu coleccion di informacion pa medio di computer.
Un negoshi enorme a worde crea pa medio di e cukinan cu no ta pa come, pero si ta duna negoshi placa pa alimenta nan mes, cu informacionnan personal cu por bira peligroso y cu awor mester cuminsa haya mas atencion den e pakete total di mundo politico, cu no por keda nabega ariba barconan bieu pero mester atende cu e mundo nobo y moderno cu a desaroya.
Un ladron no mester drumi mas pafor di un cas pa e planea su crimen, mescos cu ta e caso cu un asesino of cualkier otro tipo di delincuente. Computer a haci su bida mas facil mescos cu tur cu ta uza informacion cu ta biaha via computer, pa nan propositonan cu por ta bon pero tambe desastroso.
Central ta keda e punto, cu e derecho ariba proteccion di informacion personal, ta worde destrui den e sistema digital, cu a uni mundo di tal forma cu bida di ningun hende conoce secreto personal mas.
Parlamento mester inclui e papel di cuki den comunicacion y defende e ciudadano contra ladronnan na boca di riu.
Progreso grandi ta na caminda y mester worde atende door di mundo politico, cu ta existi pa atende bienestar actual y den futuro di tur ciudadano!
