Proceso democratico a bira un tombola pa saca ganador pa haya puesto - *Democracia na Aruba peliger cu Sevinger y pelea interno di partidonan - *Leynan nobo mester exigi regla pa participacion na eleccion y den Parlamento
ORANJESTAD(AAN)—“E sucesonan cu a desaroya rond di eleccion 2021, ta motibo pa Parlamento cuminsa atende cu Leynan cu ta mishi cu su propio existencia. Loke a pasa y ta pasa na Aruba no por continua.”
Manera por a spera, ni un luna despues di eleccion 2021, ayera mundo politico di Aruba a conoce otro explosion. Despues di Accion 21 awor ta MAS ta den problema despues cu ayera candidato number 4 di e partido, a presenta su mes na Pueblo pa splica cu el a kibra cu e partido nobo di Marisol.
For di prome cu eleccion, manera DIARIO semper a adverti, ya tabata tin preocupacion serio pa e forma con politica tabata wordo mira como un caminda pa hende haya posicion politico manera abiertamente tabata wordo proclama.
DIARIO hasta a yega di relata situacion den cual den medionan social, candidatonan ta trece dilanti cu nan kier bira Ministro di e pais na un forma cu nunca a socede na Aruba, cu ya a wordo humilia pa berguensa di tin sospechosonan di casonan criminal den su Parlamento.
Ayera otro caso a rementa, ora e candidato riba Lista di MAS, Solangel Lacle, a presenta su mes na publico pa anuncia cu el a kibra cu e partido cu Marisol Lopez-Tromp na ultimo momento a logra di forma pa participacion na eleccion 2021.
Lacle a mustra riba palabracionnan interno den e partido cu no a wordo honra y e hecho cu e lugar cu e mester a ocupa segun e documentonan interno di e partido di Marisol, no a wordo honra.
DIARIO despues di e presentacion di Lacle ayera, cu a duna un splicacion di loke ta pasa den e partido di Marisol, a profundisa cu expertonan riba e situacion serio cu ta presenta den Parlamento, cu ta representacion di Pueblo di Aruba pero cu awe manera tur experto ta acorda, ta enfrenta menasa serio.
Na prome luga e proceso electoral a conoce angulonan nobo desconoci pa Aruba na 2021 ora hasta e candidato riba lista di AVP, Benny Sevinger, tabata den prison na momento di eleccion y te awe no por huramenta.
Expertonan ta mustra DIARIO cu loke a pasa cu e caso Sevinger, ta duna prueba con un pais por wordo forsa dor di un partido politico, den e caso aki AVP, pa bay contra moral di e Arubiano.
E caso contra Benny Sevinver a cuminsa hopi tempo pasa y for di e momento a pidi Benny Sevinger retira mientras e tabata sospechoso. El a nenga y como sospechoso a keda Miembro di Parlamento mientras ya Husticia a cuminsa realisa detencionnan preventivo den e caso aki.
AVP a haci uzo di leynan cu tempo cu nan a wordo skirbi no a tene na consideracion cu situacionnan manera di awe por presenta. Esaki a haci cu AVP a forsa Aruba di acepta un candidato pa Parlamento y cu AVP a percura pa haya suficiente voto, pa drenta Parlamento cu tin 20 miembro y no 21 miembro huramenta manera ley ta exigi.
Ley ta exigi 21 miembro pa asina evita dos grupo di diez persona cu por tranca e sistema di mayoria.
Pues si ya Sevinger a bira un situacion doloroso pa Aruba, por mira con directamente despues di eleccion a surgi problema den e partido Accion 21 cu a haci cu resultado directo pa Parlamento.
E situacion actual di Accion 21 ta haci cu na momento cu pa un motibo of otro candidato number uno di Accion 21 hala atras, Daphne Lejuez ta drenta Parlamento como independiente y ocupa e asiento cu hasta por resulta den cambio di un gobierno.
MAS ta un partido cu a wordo presenta den careda dor di Marisol cu na 2021 a drenta noticia como guerero politico despues cu el a kibra cu su partido POR.
El a logra dos asiento y palabracion den e partido tabata pa no Gun pero Lacle drenta a base di su cantidad di voto.
Awe spada ta wordo cruza pasobra Gun a drenta Parlamento.
Segun expertonan mester cambia reglanan pa formacion di partido politico den cual convenionan mara na ley ta wordo cera. E stabilidad di Parlamento ta na wega ya cu cualkier momento por surgi cambio den representacion di un partido.
Na mes momento ta bira cada rato mas discutibel si representacion di Pueblo ta wordo uza pa sirbi Pueblo. Sucesonan ta duna tur indicacion cu Parlamento ta core riesgo di bira un tombola pa ganador haya puesto y entrada pa no papia mes di poder haciendo uzo di democracia.
