Un mundo na careda den un instabilidad total ta exigi atencion --- *Hopi suspenso bou Arubianonan den exterior pa crisis explosivo --- *Un solo paso robez por provoca loke ta e temor grandi di mundo
ORANJESTAD(AAN)—“Ta increibel cu Parlamento di Aruba, ainda ta ocupa su mes cu asuntonan cu ta sin peso, compara cu e peliger grandi cu mundo conoce.”
Esaki ta expresion di experto den relacionnan internacional, cu ta indica cu mundo politico na Aruba no ta prepara Pueblo pa situacionnan sumamente serio cu lo afecta mundo.
“Un mundo ta na guera. Hulanda, cu ta partner den Reino di Aruba, ta na guera cu Rusia den e crisis Ukraine, cu ta conoce dos grupo di aliansa cu ta opone otro.”
Segun e informantenan di DIARIO ta increibel cu Conseho di Seguridad di Nacionnan Uni continuamente mester reuni pa mira con ta atende cu asuntonan seriamente manera uzo di bom nuclear y bom biologico, cu lo plama bacterianan cu ta destrui e ser humano.
E siman a cera cu informacionnan serio cu ta indica cu e aliadonan di e Aliansa Norte Atlantico cu ta inclui Hulanda, ta evita na tur costa pa causa un situacion cu pa Vladimir Putin por ta motibo pa haci uzo di armanan cu ta nifica inicio di Tercer Guera Mundial.
“Aparentemente lidernan mundial kier calma un Pueblo cu ta den tension grandi a base di desaroyonan cu nan mes por sigui cada minut y cu ta mustra cu mundo kier tapa solo cu un dede y no papia di e posibilidad grandi di un Guera Mndial,” informantenan a trece dilanti.
Informacionnan cu DIARIO ta ricibi di Hulanda, ta indica cu un grupo grandi di Arubiano na Hulanda, ta biba cu temor grandi pa loke por pasa cualkier momento na Ukraine.
“Refugiadonan di Ukraine ta yega Hulanda. Hulandesnan ta paga pa armanan cu cual Ukraine mester defende su mes. Tin cantidad di famia cu lazo cu Ukraine na Hulanda y hasta tin famia Hulandes na Ukraine y Rusia,” a wordo trece dilanti.
Manera DIARIO for di un inicio a trece dilanti, no ta conoci si tin Arubiano tambe cu ta parti di e accionnan militar actual den cual Hulanda ta envolve y cu no directamente ta hiba un militar na e zona di guera.
Manera a wordo splica na DIARIO, Parlamento di Aruba como representacion di Pueblo ya mester a bini hunto den un reunion pa atende e situacion actual.
“Kico ta spera?” a wordo puntra dor di informantenan cu a splica cu region di Caribe tambe ta refleha e situacion di guera, cu no ta haya atencion.
Un tension grandi ta reina tur caminda, mientras informacion ta drenta con e situacion ta sigui escala.
Veteranonan rond mundo ta bandona nan pais pa duna asistencia na e ehercito di Ukraine, mientras Rusia ta busca aliadonan na paisnan cu ta contra Merca y Union Europeo.
Japon ta na parti di Aliadonan. Paisnan Europeo cu nunca kier a clasifica nan mes, awor ta den accion hunto cu Union Europeo.
Mundo a drenta un fin di siman sumamente explosivo den cual cada rato e miedo cu Putin por crea un desastre mundial por ta realidad.
Mamanan na Rusia ta trata di saca nan yiunan for di Rusia pa nan no mester bay bringa den un guera, cu hopi Ruso mes no ta comprende pero cu nan no por rechasa pasobra ta un solo homber, cu ta Putin ta dicidi.
Mientrastanto mundo ta realisa cu ta cu un persona cu no ta capaz di controla su mes, cu ta Putin, mundo mester bringa.
Segun informantenan na e momento aki, Parlamento di Aruba mester reuni y mira con (sin wega politico) ta forma un union pa hunto prepara Aruba y Arubianonan pa un situacion sumamente peligroso cu ya a destrui normalidad na mundo cu un confrontacion cu ta internacional, pa uza e palabra cu no ta “mundial”.
