Endy Croes tin di baha di e asiento
- Votamento tabata 11 pro pa baha Ministro y 10 voto contra
- Firmamento di retiro awor den man di Gobernador
ORANJESTAD (AAN): Diaranson marduga alrededor di 1’or di marduga, Parlamento a vota riba un Mocion di Desconfiansa cu a wordo presenta contra Ministro Endy Croes, basa riba e estilo y forma cu e titular di Deporte a atende e asombroso caso di fraude na Sports Subsidie Aruba, tambe di su forma di e mes pidi quotation pa cierto asunto, y tambe a cuestiona con ta haci pagonan grandi na su ruman muher.
Na final di e reunion cu a dura mas di 14 ora largo, Parlamento a vota 11 pro y 10 voto contra. Esaki nifica cu oficialmente Ministro Endy Croes no ta conta cu sosten y confiansa mas den Parlamento, y esaki ta indicacion cu e lo tin di bay baha di e stul.
Esnan cu a vota pro tabata henter Partido AVP, Partido MAS, Partido Accion21, Partido RAIZ, y Parlamentario Independiente Gerlien Croes.
Parlamentario Independiente Ryçond do Nascimento a vota contra, igual cu henter fraccion di MEP.
Den DIARIO di awe por lesa riba e plannan pa traspasa e carteranan pa otro Ministro, y of core nombra un Ministro nobo pa maneha esaki den e ultimo lunanan cu Gobierno ainda tin pa bay.
Di partido MEP a tende mesora reaccion, cu Partido RAIZ a uni cu AVP aki den e zet aki pa kita Croes for di e Ministerionan aki.
Gobernador tin di bay firma e retiro di Ministro, y tin di mira si acaso e ta hacie of no. Pasobra por mira cu ta djis algun dia so tin mas pa eleccion nobo cu ta na caminda.
Tin di remarca, cu e Mocion di Deconfiansa cu a aproba den Parlamento, ta dirigi unicamente pa pone Endy Croes retira como Ministro. Pues e Mocion ey lo no stroba Croes di campaña y participa den eleccion di dia 6 di December venidero.
