ORANJESTAD (AAN): Dia 1 di juni 2026, e conocido locutor Cecilito Lopes a cumpli 40 aña di aniversario den radiodifusion na Aruba.
Parlamentario Xiomara Maduro no kier a laga e bunita logro aki pasa sin dedica algun palabra di felicitacion y gradicimento na Cecilito Lopes.
“Cu hopi aprecio nos ta dedica e palabranan aki na Cecilito Lopes na ocasion di e celebracion di 40 aña di entrega, pasion y amor pa radiodifusion na Aruba. Durante cuatro decada Cecilito su bos a yena nos casnan, nos auto y nos curason cu alegria, informacion y e calor unico cu solamente Cecilito sa brinda,” Parlamentario Maduro ta expresa.
Segun Maduro: “Cecilito no solamente ta conoci como un gran locutor, pero tambe como un berdadero embahador di nos cultura Arubiano. Cu cada programa, musica y mensahe, Cecilito a contribui pa mantene nos tradicion bibo y a fortalece e identidad di nos pueblo.”
“Cecilito, bo dedicacion, humildad y entusiasmo a toca hopi bida y a inspira generacionnan. Aruba ta profundamente gradici pa tur loke bo a haci y ta sigui haci pa nos comunidad. Na e ocasion special aki, nos ta expresa nos gratitud mas sincero y nos ta deseabo hopi salud, bendicion y mas exito ainda. Danki pa 40 aña di alegria, compromiso y amor pa Aruba. Cu hopi aprecio y respet, di nos tur cu ta aprecia bo gran trabou,” Parlamentario Xiomara Maduro ta enfatisa.
