ORANJESTAD (AAN): Fundacion Movemento ta Bida a gana e prestigioso premio Appeltjes van Oranje 2024.
E premio aki ta reconoce e esfuerso di e fundacion pa mehora e bida di e adulto mayor na Aruba y ta un testimonio di nan compromiso cu bienestar social.
E premio ta un homenahe importante pa organisacionnan di bienestar cu ta duna un yudansa significativo na e comunidadnan na Hulanda y den Caribe Hulandes.
Parlamentario Hendrik Tevreden, lider di Fraccion di MEP a declara cu aki na Aruba, Fundacion Movemento ta Bida ta evalua e implementacion di varios programa y iniciativa pa mehora e cuido di adulto mayor. Internacionalmente nan ta acudi na hopi conferencia pa nan keda al tanto di tur desaroyo, entre otro Rafapana. Eynan nan a haya ta un bon contacto, pero tambe ideanan manera loke nan ta yama Red de Adulto Mayor Bogota.
Akinan ta forma un grupo di boluntario pa yuda esnan cu ta duna cuido (mantelzorg). Esnan boluntario ta duna un dia di descanso na esnan cu ta duna cuido y ta traha e dia ey pa nan pa cuida e adulto mayor. Nan ta haci esaki den famianan cu tin mester ayudo of esnan cu no tin hende pa cuida nan na cas tambe. Nan ta yuda cu mayornan cu problemanan den bario of famianan cu ta cansa ta wordo yuda pa un dia
Tevreden a sigui bisa cu na Aruba tambe por implementa algo asina. Mester mas man pa traha y boluntarionan ta un manera pa haci esaki sigur. Nos tur lo bira adulto mayor un dia, el a expresa. Aruba ta conta cu mas of menos 2.500 participante na total den tur e 30 fundacionnan cu ta atende cu grandinan rond di e isla. Asina mes tin riba 20 mil adulto mayor cu no ta participando den areanan social y e fundacion ta desea pa mas di nan bira activo y no keda na cas solamente.
For di Parlamento, Parlamentario Tevreden lo haci e peticion pa Departamento di Salud Publico y Departamento di Mayor si nan lo por haci un encuesta y tira un bista mas profundo unda e otro 22 mil adultonan mayor ta den nos comunidad. Lo ta bon tambe pa bin cu ideanan despues di a inventarisa pa aumenta e participacion di nos grandinan den e tipo di fundacionnan aki cu ta mantene nos grandinan activo mas largo cu por. Esnan cu ta 60-70 aña pariba ta e grupo mas grandi cu ta participando na actividadnan. Esnan riba 70 ta e grupo mas chikito cu ta participando y grupo despues di esey di no tin un bista mas cla unda nan ta, Hendrik Tevreden a remarca.
Loke si Fundacion Movemento ta Bida a remarca ta cu tin un lista di espera na cierto gruponan. Y pa tur e grandinan cu ta riba lista di espera e idea ta pa nan mes cu ayudo di Fundacion Movemento ta Bida forma un grupo y asina no keda mas riba lista di espera.
Pa cu presupuesto 2025 Tevreden kier pa cada un fundacion, di cual ta 30 mas o menos, pa nan peticion pa haya fondo extra wordo concedi y lo boga den tratamento di presupuesto pa e fondonan aki yega pa nan anualmente. Esaki lo yuda pa nan eventonan, y pa e cumpra material cu nan mester pa por funciona como fundacion. Awor cu tin surplus e mester ta posibel, segun Parlamentario Tevreden.
