"Mansur un candidato nobo den politica pero bieu y bruha den pensamento"
ORANJESTAD (AAN):: Parlamentario Hendrik Tevreden, lider di Fraccion di MEP, a lansa un critica serio contra Parlamentario di Accion21, Sr. Miguel Mansur, kende ta boga pa basha hotel abou na Aruba.
Tevreden a considera e propuesta aki hopi radical y peligroso, alertando e pueblo tocante e posicionnan di Mansur. A pesar di e reconocimento cu mester limita hotelnan grandi, of hasta 'No More Hotels' y sigur proteha naturalesa di cual cu MEP mes a traha pa reduci e cantidad di camber di hotel na nos isla, Tevreden ta enfatisa cu e propuesta di Mansur ta demasiado extremo pa kier basha hotel abou.
El a enfatisa cu ta berdad cu AVP a parti 7000 permiso y camber di hotel y MEP a traha duro pa baha esaki na 2000 camber. Berdad ta cu no por a bah'e mas pasobra esnan cu ya ta asina leu cu nan permiso no por para mas y gobierno lo perde den corte cu daño di perhuicio halto.
Otro berdad ta cu Minister Dangui Oduber su vision ta pa no construi mas Hotel grandi na Aruba pero mas bien Boutique Hotels di maximo 75 pa 100 camber y sigur conserva nos naturalesa mas. Pesey pregunta di preocupacion ta surgi basa riba e ponencia radical aki di Sr. Mansur kende ta un menasa pa e pais aki.
Entre e preocupacionnan cu Hendrik Tevreden ta expresa den su critica, tin preguntanan cu Mansur lo tin di contesta. Preguntanan manera si sigi e pensamento di basha e hotel abou, con ta para cu e acuerdo entre Aruba y e cadenanan di hotel cu ya ta estableci pa mas di 20 aña aki?
Cuanto hende lo tin di manda cas directamente pa motibo cu nan no tin establecimento pa traha na dje? Unda otro e personanan aki lo haya trabou pa por sigui provee pa nan mes y nan famia?
Cuanto daño basha un hotel abou ta hasi na naturalesa y rond di unda e hotel ta traha? Unda lo hiba tur e sushi di y resto di un hotel asina grandi? Ken ta responsabel pa atende cu e sushi aki e hotel o gobierno?
Cuanto tempo e bisindario rond di e hotel tin di keda cera pa peliger relata cu construccion cu esaki ta trece cu ne?
Di unda lo recupera e entrada economico pa pais Aruba cu e hotel aki ta trece cu ne? Kico lo ta e substituto pa e perdida cu ta wordo crea aki?
"Y asina facilmente tin mas preguntanan cu pueblo no tin contesta pa nan cual ta haci dificil pa para tras di e pensamento aki di Sr. Mansur pa yega basha hotel abou. E ta parce cu pa busca un argumento contra gobierno e ta menciona sin mas pa basha hotel abou, sin a pensa riba e demas consecuencianan cu tin tras di un posibel decision.
Tur esaki ta mustra riba e echo cu e no ta planea ni loke e ta bisa of pensa prome cu e haci esaki publicamente, pero ta opera estilo adhoc. Algo cu sigur nos no mester mas den e politica cu nos ta lagando atras.
Accion 21 ta un partido y Mansur un candidato por ta nobo den politica pero bieu y bruha den pensamento. Cu e peliger di hiba nos pais den un direccion robes si acaso e haya e oportunidad pa goberna. Berdad nos no mester mas hotel nobo, pero tampoco mas Miguel", e parlamentario a bisa.
