ORANJESTAD (AAN) – Parlamentario di fraccion di MEP, Shailiny Tromp-Lee, a yama un conferencia di prensa for di Parke Curazon, na Jaburibari.
El comenta cu el a yega for di mainta trempan, y a haci un recorido den e parke cual ta hopi cerca di su curazon, pasobra el a keda construi tempo cu su tata señor Ramon Lee, tabata Minister di Deporte.
Parlamentario Tromp-Lee a expresa cu esaki ta un parke cu a demostra su necesidad y cu ta wordo uza diariamente, for di mainta te anochi. El a bisa cu e ta contento di por a haci e recorido aki, unda e por a tuma nota di diferente trabao di mantenimento cu a, of ta, tuma lugar.
E ta haya cu e trabaonan di mantencion ta hopi necesario pasobra un inversion grandi a wordo haci den e parke aki y ta hopi importante pa mantene su calidad y funcionalidad na e forma mas optimal posible.
E ta contento cu nan a drecha e yerba di e parti cu ta wordo hopi uza pa e hobennan, y cu e mantencion ta wordo haci debidamente y cu e uso ta keda garantiza.
Shailiny a comenta cu desde cu el a bira Parlamentario, el a haci un video di e lugar completo, y un di aspectonan cu el a pidi hopi atencion pe, ta e parti di hunga pa e muchanan.
E parti aki tabata den un estado hopi deplorable, y e ta contento cu despues di tanto tempo, a haya su mantencion debido.
E localidad pa 60 plussers a keda benta abao recientemente, y akinan e tin un pregunta pa Minister di Deporte, kico ta bay ta su intencion pa cu e espacio cu a keda liber y cu sigur ta bay duna e grupo di grandinan nan atencion bek den e parke aki, tambe.
Despues cu a cera e luna cu gobierno a declara como Luna di Nos Grandinan, el a comenta cu nan mester a realiza un bishita na e Grupo Aloe, cual ta hopi activo y cu ta uza Parke Curazon riba Dialuna y Diahuebs, pero lamentablemente como cu e agenda di fraccion di MEP a yena cu hopi reunion, a haci dificil pa nan realiza e bishita.
Pero esaki a tuma lugar Dialuna, unda henter e fraccion di MEP a yega pa comparti cu e grupo menciona, y nan sa cu nan tin hopi peticion pa e parlamentarionan aki. El a bisa cu e fraccion lo duna atencion na e peticion pa haci e parke aki mas accesible pa nos grandinan y cu nan por haci uso optimal di dje.
