ORANJESTAD (AAN) – Parlamentario Setty Christiaans- Yarzagaray, a duna un relato relaciona cu e Ley "Landsverordening Normering Topinkomens” LNT, cu a wordo trata den Parlamento y a keda aproba dia 30 di Juni.
Cristiaans-Yarzagaray a splica cu e ley aki ta regarda institutonan semi-gubernamental y tin e meta principal en principio di crea un instrumento, den forma di un norma legitimo, den un sistema salarial introduciendo un maximo pa e top funcionarionan di e Institutonan semi-gubernamental aki.
A introduci un norma maximo cu ta yega 130% di e salario di Minister Presidente di Aruba, saliendo for di punto di bista cu ta e cargo maximo di e pais, y e responsabilidad cu e funcion aki ta encera.
E parlamentario a subraya cu e ley aki por trece nivelacion y normalizacion den e sistema salarial, treciendo structuranan den e Institutonan aki. El a indica cu di un forma of otro, e companianan estatal ta opera cu, of ta genera, placanan cu ta bin di pueblo, y tambe cu gobierno ta accionista principal den su mayoria.
Otro institutonan den e sector publico di gobierno, tin su sistema y su cuadro legal na unda e sistema salarial ta wordo structura y ta defini e salario di un minister y salario di un parlamentario, y esey ta loke companianan semi-gubernamental tabata carece di dje y pesey a bin cu un structura.
E ley aki en principio no a cuminza awo ni a bin di Hulanda, pero a bira si, un condicion di Hulanda na unda e necesidad pa pase, mirando e situacion financiero precario di Aruba, Hulanda a pone como condicion pa haya un parti di e sosten di likidez den e momentonan di Covid-19, y ultimo Hulanda a pone como condicion pa por cuminza duna bek parti di e recorte salarial di 12.6%, cu a wordo poni riba e empleadonan publico.
E presupuesto di e aña aki a wordo presenta dunando e 5% bek na empleado publico, e siguiente aña, y Hulanda a tuma esaki como un di e condicionnan.
