Ban celebra 18 di Maart en grande!
ORANJESTAD (AAN): Dia di Himno y Bandera ta sigur un ocasion hopi importante pa celebra. Ricky Hoek, Parlamentario di Fraccion di MEP a expresa cu den cuadro di e dia aki, diabierna mainta hunto cu Prome Minister Evelyn Wever-Croes a bishita Scol Basico Washington.
Eynan por a disfruta di un serie di actividad educativo- cultural hopi bunita y interesante pa e muchanan cu di e forma aki ta inculca den e muchanan e amor pa e pais y pa cu e bandera, pero tambe e lucha y e pakico ta celebra e fecha aki di 18 di Maart.
Entre otro, e scol a duna un presentacion na e muchanan di e 'mobiele eenheid' riba e tema di seguridad nacional di Pais Aruba. Tambe tabata presente Crisis Management Office cu a duna un presentacion di tur nan ekiponan pa atende un situacion di calamidad pa asina siña e muchanan tambe con pa atende cu personanan cu ta keda herida y con e sistema di emergencia ta traha.
Bunita tabata e cantonan y e musica folklorico cu artistanan local a comparti cu e muchanan. tambe e pinturanan y obranan di arte cu e muchanan a traha pa celebra e dia nacional.
Den un klas a siña e muchanan con pa traha pan bati. Hopi mucha a laga sa cu nan sa e ingredientenan pa traha un bon pan bati y esey tabata algo hopi leuk mes, Hoek a expresa.
Pakico un dia nacional ta importante?
Esaki ta contribui na e unidad y patriotismo cu un pais mester, e parlamentario a remarca. Aruba a pasa den un lucha grandi pa bira independiente y logra e proyectonan cu tin. Awe por wak cu desde 1948, caminda cu e cuminsa cu e separacion di Aruba pa sali fo'i di e constelacion di Antias y despues cu riba 18 di Maart 1976 caminda cu a hisa e bandera y a presenta e simbolonan di identidad, esaki a keda fomenta y a culmina cu Status Aparte na aña 1986, Ricky Hoek a expresa.
Pesey un dia nacional ta hopi importante. E parti di educacion ta hopi importante. Pasobra scolnan ta inculca e conocemento como tambe e historia di e pais y e importancia di e lucha cu e pais a hiba.
Asina tur persona cu ta biba y cu ta contribui cu e pais aki por traha na e engrandecemento di e pais den e parti social, economico, financiero.
"Banda di esey ta un dia pa refleha riba e logronan cu Aruba tabatin, cual ta logronan grandi y cu ta pone nos sinti orguyoso, sea cu bo a nace na e pais aki of cu bo ta biba riba e pais aki, pero cu nos tur ta uni como un famia grandi pa aporta na e pais cu yama Aruba", a bisa.
Den cuadro di e dia nacional aki, Parlamentario Hoek ta felicita tur ciudadano pa celebra dia 18 di Maart en grande, como un bon rubiano, e rubiano cu a haci Aruba su cas celebrando hunto nos bandera, nos escudo, no himno, nos nacionalismo", Parlamentario Hoek a finalisa bisando.
