ORANJESTAD (AAN): Dialuna ultimo durante un encuentro ameno, Parlamentario Alvin Molina di MEP a reuni cu presidente di Kiwanis Club of San Nicolas señora Endrah Richardson-Gumbs, vice- presidente señora Joanette Vrutaal.
Presente na e ocasion aki tabata presente Minister Presidente señora Evelyn Wever-Croes y Minister di Enseñansa y Deporte sr.Endy Croes.
Durante e reunion señora Richardson-Gumbs a conta nos di e historia di con e club a worde funda y e bunita proyectonan cu Kiwanis Club of San Nicolas ta haci na bienestar di muchanan y di comunidad di San Nicolas.
E club ta forma parti di Kiwanis Internacional cu ta un organizacion global di boluntario dedica na mehora mundo via un mucha y via di un comunidad cada biaha y tin como lema: sirbi e muchanan di mundo.
Na luna di januari ultimo Kiwanis Club of San Nicolas a cumpli dos aña sirbiendo comunidad y ta conta cu un total bintinuebe miembro activo. Durante e reunion a presenta e ultimo proyecto di e club cu ta ‘Smile Drive’. E proyecto ta ensera cu si bo cumpra un tumbler, e contribucion ta bay pa un mucha por bishita dentista pa haya su saneringsbrief y despues e mucha por drenta den sistema di AZV. Ban yuda nos muchanan di menos recurso, cu un smile bunita. Tambe a elabora cu Kiwanis Club of San Nicolas a ‘charter’ un club di servicio pa hoben na Filomena College MAVO ‘Builders Club Filomena College’ unda lo siña e hobennan entre otro di e importancia pa traha den ekipo, duna back na comunidad y liderazgo. Pronto lo tuma luga e instalacion oficial di e miembronan y directiva di Builders Club Filomena College.
Nos ta gradici e miembronan di Kiwanis Club of San Nicolas pa nan bunita trabao cu nan ta eherce y pa e amor y pasion pa sirbi e muchanan di San Nicolas. Alavez nos ta felicitanan cu e club nobo pa nos hobennan y ta deseanan exito cu proyecto di ‘Smile Drive’.
