‘Lidernan politico mester tuma decision y no sigui discuti y traha raport’
ORANJESTAD (AAN): Parlamentario Mike de Meza a expresa su sosten na e decision di Gobierno pa aumenta salario minimo. Segun e, durante 20 aña como politico, tanto den funcion di minister como di parlamentario, semper su enfoke tabata riba poder di compra y yuda esnan cu menos entrada. E parlamentario a expresa cu na momento cu tin aumento di costo di bida, mester purba drecha e poder di compra y ta para tras di esaki.
Un ehempel cu el a menciona ta di Partido MEP cu a tuma decision di kita e impuesto di un grupo significante den nos comunidad, y a haya sosten di Partido AVP. Tambe el a menciona e aumento di pension pa nos grandinan.
Segun de Meza, un lider politico mester tuma decision y no por sigui discuti y traha raport tras di raport. Den e ultimo 20 añanan, tin hopi raport a wordo traha y investigacionnan haci. Sinembargo, e sufrimento di pueblo ta conoci. E pobreza den pueblo ta conoci. Y tambe, e situacion di esnan cu tin salario minimo ta conoci.
Ademas, ta conoci tambe cu costo di bida a aumenta. Prijsnan den supermercadonan ta aumentando. Paña y sapato entre otro tambe ta caro. Remedinan cu ciudadanonan mes mester paga tambe ta caro. Gasoline ta caro. Bisando esaki, e ta puntra con esnan cu ta biba marginal por tin un bida digno.
Parlamentario de Meza a expresa, cu sabiendo tur esaki, ta masha facil pa yega na decisionnan. Y cu no mester ta problema pa sinta cu gremionan comercial y sindical. Segun e, tin diferente forma pa sali for di esaki. Pero, mester haci esaki responsabel y aumento di salario minimo mester ta dirigi riba esnan cu tin mester di e esaki.
El a menciona cu por haci esaki den diferente forma, entre otro, door di aumenta reparatie toeslag y bin cu compensacionnan pa companianan. Di e manera aki, segun e parlamentario, ta cuminsa yuda esnan cu ta biba marginal.
“Lidernan politico no mester paralisa nan mes den tur sorto di analisis y na final di dia, no tin niun decision tuma. Tuma decision. Para pa algo. Para pa esnan cu entrada marginal. Pa nos pensionadonan, y pa tur cu ta biba marginalmente den nos economia, pasobra tur hende merece un bida digno”, Parlamentario Mike de Meza e enfatisa.
