ORANJESTAD (AAN): Algun dia pasa mi a saca un articulo riba e derechonan fundamental cu cada ciudadano tin pa disfruta di nos beachnan,
y cu palapanan construi riba patrimonio di pueblo no ta propiedad ni ta cay bao autoridad di hotelnan. Mi a pone enfasis cu tanto localnan y turista di otro hotelnan tin e derecho legal pa uza e palapa di cualkier hotel riba beach, sin cu siguridad di e hotel en cuestion por reclama algo.
P’esey, mi ta urgi hotelnan pa informa nan trahadornan pa asegura cu niun di nan trahadornan por kibra derecho legal di nos ciudadanonan, ora nan ta bay haci uso cualkier palapa riba beach.
Protesta y Responsabilidad
Siman pasa nos por a wak un protesta a tuma lugar na Baby Beach. Mi kier enfatisa cu tur ciudadanonan di e pais aki por organisa protestanan, pasobra esaki ta nan derecho. Sinembargo, mi punto ta cu e mester wordo haci di un forma responsabel. Ta importante pa pone un meta pa e protesta, sinembargo, sin cu esaki ta “kibra of afecta” nos unico pilar economico.
Alaves mi ta puntra, ta kico kier logra cu un accion di protesta cu ta pone turistanan sinti cu nan no ta welcome na Aruba? Un protesta mester tin un meta comun, cu mester inclui respet y responsabilidad. Vocifera sin haci daño, actua sin trece na peliger e turismo cu dies miles di ciudadano ta depende riba dje, y semper actua cu noblesa y na bienestar di nos pais.
Mi ta encurasha Dialogo.
Mi ta di opinion cu mester bin un dialogo entre e grupo di protesta y minister Dangui Oduber, cu den su articulo di prensa a duna señalnan cu e ta habri pa esaki. Pueblo ta keda na prome lugar pa nos tur, pesey si tin inkietudnan bao di pueblo of un grupo di persona, mi ta encurasha pa e dos partidonan sinta cu otro.
Na final, nos tur kier mira solucionnan pa cierto desaroyonan den nos pais cu ta preocupante. E ta noble pa haci tur esfuerso pa yega na un solucion, y tin e grandesa pa yega na otro cu respet. Hamas nos preocupacionnan mester tuma un forma destructivo, y sigur no pa e unico pilar economico di nos pais. Tin demasiado den balans pa nos pais! Aruba mester di nos tur, y si berdaderamente nos curason ta den e lugar corecto, nos lo haci e esfuerso pa conecta cu otro y yega conhuntamente na un dialogo, cu por crea e oportunidad pa e partidonan conhuntamente por yega na un plan solido cu ta beneficia nos tur.
Mi ta invita e grupo di protesta pa ta mas intencional pa trece solucion pa su preocupacionan, y pa ehecuta su protestanan di un forma responsabel. Tin formanan decente y corecto pa promove boso ideanan. Aruba mester di lidernan madura cu semper ta pone Aruba prome; sea pa naturalesa, sea pa finanzas, sea pa turismo, corda, nos tur hunto ta Aruba!
