ORANJESTAD (AAN) – Parlamentario Darlaine Guedez-Erasmus, durante e conferencia di prensa di fraccion di MEP,
a bisa cu den luna di Mei hopi proyecto a wordo introduci y otronan di renovacion a wordo ehecuta, manera esun di Parke Curazon na Djaburibari unda a pone e nomber di Denzel Dumfries na un parti di e tereno unda muchanan di scol ta bin hunto pa hunga.
Tambe e proyecto WE cu ta e weganan escolar cu lo wordo inaugura na luna di Juni, unda alumnonan di tur nivel escolar for di kleuterschool te avanza por participa.
Asina scolnan ta uni y brinda e parti di deporte hopi atencion, y e parlamentario ta haya cu esaki ta hopi necesario, pasobra asina e muchanan ta keda saludable y ta socializa cu otro.
El a referi tambe na e campaña nacional “Mi mesun heroe” cu a wordo lanza Diasabra cu a pasa, pa asina proteha e muchanan di abuso sexual. E campaña aki lo tin un duracion di dos aña cu lo consisti di 52 episodio cu lo wordo transmiti na Tele-Aruba. Asina e muchanan por haya mas informacion tocante abuso sexual di mucha y con nan autoestima por ta halto y siña e partinan di nan curpa. Asina nan por bisa NO tambe, na momento cu algo presenta y nan por defende nan mes.
Guedez-Erasmus a señala cu e ta haya hopi importante pa empodera nos muchanan desde un edad hopi chikito, pasobra ya nan por ta hopi conciente y nan por haya tips pa asina nan por mira señalnan pa asina nan por preveni tambe, pasobra si Aruba kier ciudadanonan cu ta fuerte, bon, di un bon famia y cu por brinda nos comunidad lo miho, sigur mester percura pa e mucha for di chikito caba cu ta crece, por wordo bon cuida.
E parlamentario a expresa un elogio grandi na Edseline Figaroa, pa tur su esfuerzo y añanan cu e ta bezig cu e proyecto aki, y tambe na su team completo a yuda den haci esaki realidad, y sigur henter e Gabinete Wever-Croes, cu mester a percura pa esaki por a wordo realiza. El a gradici su coleganan di Parlamento, esnan cu ta vota pro di e presupuesto, pa e proyecto aki por ta un realidad.
