Segun parlamentario Marco Berlis:
ORANJESTAD (AAN) – Den Conferencia semanal di fraccion di Partido MEP, señor Marco Berlis a reacciona tocante un opinion emiti pa Parlamentario Gerlien Croes, di fraccion di AVP, Diamars.
Parlamentario Berlis a bisa cu Gerlin ta cuestiona e vision di WEB y e vision energetico di Gobierno, y el a haci remarca riba algun expresion di e parlamentario di AVP.
Entre otro, segun Berlis, Gerlien a expresa cu e no ta compronde pakico a bin cu e proyecto di LNG di gas natural, y aworaki ta bin cu mulina di biento. Segun Berlis, Gerlien ta mira esaki como algo dudoso y hasta di corupcion.
E parlamentario ta haya esaki hopi straño pero di otro banda e no ta strañe pasobra pasobra dia 11 di Januari di e aña aki, Parlamento tabata tin un presentacion na WEB bao invitacion di e compania, tocante Eagle LNG, pero tambe pa conoce nan vision energetico pa locual ta Aruba di futuro.
Asina Parlamento a haya un bista completo di unda e tabata y na unda e ta bayendo. Y den esaki a splica ampliamente, con lo a bin cu gas natural, y despues lo amplia tambe e parke di mulina y lo cambia esnan actual pa otronan mas moderno, cu lo ta 15% mas eficiente den produccion di coriente, y tambe lo amplia den panelnan solar.
El a sigui bisa cu ta hopi importante pa e representantenan di pueblo acudi na e reunionnan aki pasobra asina nan por amplia nan conocemento di locual ta sosodiendo den e area aki.
“Lamentablemente, mi tin cu bisa cu henter fraccion di AVP no tabata presente, y no tin nada straño pa mi ora mi tende un representante di pueblo di fraccion di AVP manera Gerlien Croes, ta papia un barbaridad, y sigur completamente incorecto, sin compronde e vision energetico di Aruba NV”, Parlamentario Berlis a señala.
