ORANJESTAD (AAN) – Parlamentario Endy Croes, di fraccion di MEP, den conferencia di prensa a referi cu elogio, na e proyecto di vivienda vertical, cu lo wordo desaroya na Eagle,
cual a wordo presenta siman pasa pa Prome Minister Evelyn Wever-Croes den su calidad di minister di infrastructura, y pa su desaroyador Victor Acosta, di Palma Aruba Group.
E parlamentario ta menciona cu esaki ta un proyecto ultramoderno, cu ta hiba e nomber di “Caribbean Town Villas Apartment”.
Parlamentario Croes a reitera cu esaki ta e prome proyecto vertical, ya cu manera tur hende sa, tin scarcedad di tereno pa traha cas na Aruba. Ta trata aki di 330 vivienda. Esaki ta encera un vision unda cu por acomoda diferente famia, pero tambe na un manera tradicional.
E parlamentario a indica cu den e proyecto aki a tene cuenta cu e aspecto di tradicion di Aruba su cultura hunto cu e necesidadnan di principionan di sostenibilidad.
A tene cuenta cu e metanan di desaroyo sostenible, specialmente punto 1 cu ta “Sustainable Cities & Communities”. Tambe tin casnan residencial mucho mas grandi manera “townhouse”.
Croes a menciona cu esaki ta un proyecto conhuntamente cu gobierno y esnan cu ta bin prome na remarca, ta esnan cu a pidi un tereno desde 2012 bin ariba, cu ta pega. Nan por busca informacion via DIP of e website, y solicita pa un di e viviendanan aki.
E compleho di vivienda aki ta conta cu diferente facilidad incluyendo piscina y prijs ta accesible, segun e parlamentario.
