WILLEMSTAD: Siman a habri cu un serie di pregunta haci pa parlamentario Ramón Yung di Partido MFK na Curaçao, den direccion di Ministro di Finanza, esta Javier Silvania.
El a corda Ministro cu den tratamento di presupuesto pa 2025 cu a ser haci dia 9 di December 2024, cu fraccion di MFK sosteni pa algun fraccion mas, a presenta un mocion den Staten, pa Gobierno bin cu un pago di Bashi Premie pa cobradornan di AOV cu tin un entrada igual of menos cu 1.100 Florin pa luna.
E mocion aki a wordo acepta den Parlamento, pasobra a tene cuenta cu ta trata di un grupo di ciudadano vulnerabel. Cifranan di CBS na Curaçao a indica cu tin 51.000 ciudadano cu ta ricibi AOV, pero di cual casi 23 mil tin un entrada cu no ta sobrepasa 1.100 Florin.
Asina e pago di Bashi Premie a tuma lugar dia 10 di Januari 2025. Pero net prome cu e pago a socede, a bin mira ta cuanto interes tin cerca un grupo cu ta cobra AOV pero ta cay net riba e entrada maximo di 1.100 Florin.
Realidad ta cu ultimo biaha cu a indexeer AOV tabata na aña 2012, pues e ciudadanonan ey tin 12 aña ta ricibi e mesun suma di AOV. Di otro banda, Gobierno di Willemstad ta reconoce cu inflacion tin consecuencia serio pa e grupo di pensionado aki cu ta cobra AOV.
Un investigacion di CBS Curaçao na 2018 encuanto nivel di pobresa, a indica cu e entrada pa un adulto ta 1.315 Florin. CBS e ora a conseha pa anualmente indexeer e sumanan na cual a yega na nan den e investigacion realiza. Sinembargo na e momentonan aki, no ta dispone di e suma indexa pa e entrada minimo den caso di un adulto.
Mirando e necesidad grandi cu tin bao di e grupo di pensionadonan cu ta cobra AOV y cu talvez ta ricibi un suma minimal di pensioen for di nan ex-doño di trabao, pero toch ta keda bao di e entrada pa adulto indica door di CBS na 2018, e Parlamentario Yung a haci serie di pregunta na Ministro Silvania.
Entre e preguntanan, e ta check si Ministro ta comparti e pensamento cu e necesidad bao e grupo di pensionadonan cu ta ricibi suma di AOV, pero cu no ta sobrepasa e suma di 1.315 Florin ta hopi grandi? Mirando e necesidad bao di e grupo aki ta grandi, el a puntra Ministro si e ta mira espacio pa inclui e grupo di pensionadonan ey tambe den e areglo di ‘Bashi Premie’. E ta desea pa sa di Ministro, ta cuanto ciudadano tin cu ta ricibi AOV pero na entrada cumulativo no ta sobrepasa 1.315 Florin.
E kier sa si acaso ta bay duna e Bashi Premie na e grupo indica, ta cuanto e lo bay costa caha di Gobierno. Pero mirando cu a cera 2024 cu un surplus, e ta mustra di Ministro por duna e grupo aki tambe e Bashi Premie.
