ORANJESTAD (AAN): Parlamentario di AVP ing. Carlos Bermudez a presenta un serie di pregunta na Minister di Salubridad Publico, drs. Melvin Wyatt-Ras,
pa haya claridad completo tocante situacion financiero di Hospital Horacio Oduber (HOH) e posibel consecuencianan pa calidad y continuidad di cuido, como tambe pa profesionalnan y trahadornan den sector di salud.
Bermudez a tuma nota cu gran preocupacion di diferente publicacion y expresion publico tocante situacion actual di hospital. Considerando e papel esencial cu HOH tin den salud publico na Aruba, e parlamentario ta considera indispensabel pa gobierno brinda informacion verificabel tocante e problema, e investigacion independiente anuncia y e medidanan cu lo tuma.
“HOH ta vital pa nos comunidad. Pueblo tin derecho di sa con serio e situacion ta, con nos a yega na e punto aki y con gobierno lo garantisa cu pashent por sigui conta riba cuido sigur y di calidad,” Bermudez a declara.
Entre otro, Bermudez kier sa e motibo exacto, meta y alcance di e investigacion independiente anuncia tocante SZA y HOH. E ta pidi claridad tocante e periodo y topiconan cu lo forma parti di e investigacion, cua instancia of expertonan lo ehecut’e, con nan independencia ta garantisa y ki ora e rapport final lo ta cla.
Tambe e ta puntra si e resultado lo bin parlamento y hacie publico.
Segun Bermudez, e investigacion no mester limita su mes solamente na cifra financiero. E mester evalua tambe maneho, personal, capacidad operacional y e posibel efectonan riba calidad, siguridad y continuidad di cuido.
Otro pregunta importante ta ki momento cada instancia responsabel tabata na altura di e problemanan. Bermudez ta solicita fecha exacto riba cua Raad van Bestuur, Raad van Toezicht, UO AZV, IVA y minister a wordo informa of a identifica señalnan serio relaciona cu finansa, personal, capacidad, medicamento y material, mantencion, calidad of continuidad di cuido. E kier sa tambe cua accion a sigui y riba cua fecha.
“Si tabatin señalnan di alerta, parlamento y pueblo mester sa ken tabata na altura, ki ora nan tabata sa y kico a wordo haci. Transparencia no ta solamente presenta e situacion di awe; ta tambe splica con nos a yega aki,” Bermudez a expresa.
E parlamentario ta pidi un bista financiero completo pa cada un di e ultimo cinco añanan, incluyendo financiamento, gastonan real y eventual deficit of surplus di HOH. E investigacion mester distingui claramente entre financiamento insuficiente, aumento di costo externo, decisionnan interno di maneho, inversionnan y otro factor cu por a contribui na e situacion actual.
Bermudez ta solicita informacion detaya tocante inversionnan grandi aproba pa Raad van Bestuur durante e ultimo cinco añanan. Pa cada inversion, incluyendo ekipo medico, infrastructura y sistema di IT of EPD, e ta pidi e business case original, costo total, gastonan operacional futuro, beneficionan spera y evaluacion realisa despues di implementacion.
Specialmente tocante e sistema IT/EPD, Bermudez kier sa cuanto a presupuesta originalmente y cuanto a wordo gasta te cu awor, incluyendo instalacion, licencia, mantencion y soporte.
E rol supervisor di Raad van Toezicht y IVA tambe mester wordo aclaria. Bermudez ta puntra segun ki criterio Hunta di Supervision ta evalua funcionamento di Hunta Directiva y cua accion di supervision a tuma despues di señalnan importante. Di IVA, e ta solicita informacion tocante riesgonan y hayazgonan relaciona cu calidad, siguridad y continuidad di cuido, e recomendacionnan emiti y e accionnan cu a sigui. Tambe e kier sa ki ora minister a wordo informa tocante e hayazgonan aki y con el a actua.
Pa Bermudez, cualkier plan di recuperacion financiero mester contene garantia concreto pa evita deterioracion di cuido. Si ta necesario pa corta gasto, gobierno mester indica unda e limite ta y cua condicionnan minimo no por compromete.
“Nos mester sa cuanto enfermero minimo mester tin pa pashent y cuanto capacidad di sala di operacion mester keda disponibel. Economia no por pone siguridad di pashent na riesgo,” Bermudez a enfatisa.
Finalmente, e parlamentario ta pidi Minister Wyatt-Ras pa compromete su mes na informa parlamento periodicamente tocante progreso di e investigacion, situacion financiero di HOH, calidad y continuidad di cuido, disponibilidad di personal y implementacion di cualkier medida di recuperacion.
“E meta no ta crea mas incertidumbre, sino obtene claridad pa por tuma decision responsabel. Pashent, trahadornan di salud y henter comunidad mester por confia cu continuidad y calidad di cuido na Aruba lo keda garantisa,” asina Parlamentario Carlos Bermudez a conclui.
