ORANJESTAD (AAN): Segun Parlamentario Marco Berlis di MEP, recientemente e instancianan manera IMF, BCA y EBA a saca un rapport riba e desaroyonan economico riba e desaroyonan di nos pais.
Den e rapport aki por constata con nos pais ta recuperando y ta bayendo den e direccion corecto. Hasta e titulo di e rapport di IMF ta refleha e entusiasmo y positivismo di IMF pa loke ta e recuperacion di nos pais.
Rapport di IMF a indica: “Aruba ta bons back fuertemente for di e pandemia.” IMF ta raporta cu na 2021 e GDP di Aruba a crece cu 27.6%. Na 2022 IMF ta raporta cu nos GDP a bolbe crece cu 7.3%. IMF ta señala un desaroyo positivo: Aruba su deficit riba presupuesto durante pandemia tabata na 2020 – 16.2% y 2021- apenas 0.5% y un surplus na 2023 di 1%. IMF ta raporta cu e debe pa GDP di Aruba a baha for di 112.3% pa 90.7%, (y despues 88% CAft). IMF ta raporta cu crecimento economico di 2023 ta te aworaki na 2.3%. Desempleo a baha di 2021 di 8.8% pa 6.6% na 2022.
Rapport “State of the Economy” di Banco Central di Aruba ta mustra lo siguiente di e economia: “Den 2022, e rendimiento economico real estima a sobrepasa e nivel pre-pandemico. Un crecemento di 9.6% registra den producto domestico bruto (PDB) real a resulta principalmente for di un prestacion solido di turismo.
Rapport di Economisch Bureau Amsterdam (EBA) cu su rapport “Caribbean Investment Climate Index 2023.” E rapport ta cuminsa declara lo siguiente: “Sterk herstel Arubaanse economie onderstreept aantrekkelijkheid investeringsklimaat.” Traduccion: Recuperacion fuerte di Aruba su economia ta subraya su clima di inversion atractivo.
Aruba a recupera esun di mas fuerte for di pandemia memey di tur e paisnan riba e lista. E lista ta inclui 17 pais: Na prome Lugar Aruba, despues St. Maarten, Puerto Rico, The Bahamas, St. Lucia, Antigua and Barbuda, Curacao, St. Kitts and Nevis, Dominican Republic, Greneda, Dominica, Barbados, Jamaica, St.Vincent and the Grenadines, Trinidad and Tobago, Cuba y Haiti na ultimo lugar.
EBA ta bisa claramente: “No tin niun pais a recupera asina fuerte manera Aruba.”
Ta importante pa remarca cu nos pais ta recuperando fuertemente, unda nos debe ta bahando cabalmente, cifranan di diferente instancianan prestigioso manera IMF, CBA y EBA ta saca rapportnan cual tur ta demostra claramente e bon trabao di gobierno y su maneho financiero. Aruba ta recuperando, nos economia ta resiliente, nos a bons back di e pandemia cu forsa.
