ORANJESTAD (AAN) – Parlamentario Arthur Vallejo, di fraccion di Partido Movimento Electoral di Pueblo, a elabora tocante “AruBIG” den conferencia di prensa di MEP.
Parlamentario Vallejo a expresa cu e por a tuma nota, cu hopi alegria, cu Minister di Salud a instala y inaugura e prome registronan AruBIG, cu a cuminza traha cune for di aña 2017.
“AruBIG ta un ley cu a bay na vigor na aña 2017, pero el a worde ehecuta lagando afo nos yiunan di tera, nos profesionalnan, specialmente esnan cu a studia na Colombia, Costa Rica, cu ta hopi cerca di nos parti di e region, cu ta hopi importante pa nos sistema di salubridad. Minister di Salud a instala un comision yama ‘Commissie AruBIG’, na Februari 2018, cual mi tabata presidi, na unda nos por a discuti tocante diferente topico y temanan hopi importante, y tambe debati cu tur stakeholders di salubridad, y nos ta hopi agradecido pa nan participacion y nan cooperacion, pasobra den tur esaki nos a bin cu nos ideanan. Nos a scucha pero tambe nos a ahusta diferente idea cu nan a trece na mesa.”
“Esey ta hopi importante, pasobra ora bin temanan cu ta asina compleho y cu tin diferente punto di bista, ta importante pa semper trece e unidad hunto, y trece solucion; solucion, finalmente, ta loke nos tabata busca”, Parlamentario Arthur Vallejo a splica.
Vallejo a indica tambe cu pa e profesion loke a logra definitivamente, ta esnan cu ta rekeri pa inscribi den AruBIG, manera Boticario, Medico, Dentista, Partera y Fisioterapeut, te awo.
El a agrega cu sigur pa aña 2022 mester tin mas trabao pa institui diferente profesional, tambe hopi importante, por ehemplo Psicologo.
Vallejo a splica cu e diplomanan reconoci pa tur profesion tin un number di BIG di Hulanda, por ehemplo cu ta e BIG conoci na Aruba, cu tabata den e ley inicialmente.
“Seguramente esey y e organizacion como specialista den e asociacion reconoci cu Hulanda, cu ta e register pa e parti medico y BIG Registratie cu ta e number 2, cu ta e mediconan alternativamente cu tin un documentacion cu ta prueba cu a pasa exitosamente e evaluacion di Merca cu ta bay worde dirigi door di e Medical Council of Canada. Y respecto na unda e persona por a studia, por ehemplo, tin e number 3 pa medio di cual ta evalua alternativamente, e diplomanan di universidadnan acredita na Costa Rica door di e Organo di Acreditacion cu ta SINAES.
Tin diferente universidad, manera Universidad Latina de Costa Rica, Universidad di Costa Rica mes, y e Universidad de Ciencias Medicas, cu ta e famoso UCIMED” Vallejo a indica.
E diplomanan di universidadnan acredita na Colombia, e Comision a uza e Organo di Acreditacion C.N.A cu ta e organo di acreditacion di calidad di estudio, mas halto na Colombia. Inicialmente, a pone dos universidad: Universidad del Bosque, Universidad Javeriana, cu ta e dos universidadnan unda mas Arubiano ta studia den e region. Segun Parlamentario Arthur Vallejo, e ta pensa cu e universidadnan aki mester worde amplia.
Den otro articulo lo sigui elabora tocante e entrevista aki cu Parlamentario Arthur Vallejo.
