Celebrando nan 50 aniversario di boda
ORANJESTAD (AAN): Un pareha turista kendenan ta stima Aruba asina hopi, a opta pa escoge nan isla stima pa celebra nan di 50 aniversario di boda, y a bay renoba nan promesanan di matrimonio na Kapel di Alto Vista.
Ta trata aki di Fred y Susan Ebbinkhuysen procedente di estado di New Jersey na Merca.
E prome biaha cu nan a bishita Aruba, tabata na November 1972. Nan bishita tabata den cuadro di nan Luna de Miel.
Nan no a realiza prome cu esey cu Aruba tabata parti di Hulanda. Nan a keda basta sorprendi, como cu Fred a nace na Utrecht (Hulanda). El a keda hopi contento cu e ta na un isla unda cu e por a papia den su idioma nativo. E famia di Fred a bandona Hulanda y bay biba na Merca na aña 1955.
For di e momento cu nan a yega Aruba na 1972, nan a wordo ricibi cu deseonan di bon bini. Nan a sinti nan mes inmediatamente “na cas” na Aruba e tempo ey.
Awor nan ta bek na Aruba ta celebrando nan di 50 aniversario di boda.
Tempo nan tabata na Aruba, nan ta corda cu tabatin solamente 1 hotel, esta Aruba Caribbean Hotel, y nan tabata den proceso pa construi Holiday Inn.
Fred y Susan a keda impresiona cu e beyeza y ambiente di e isla. E trato ricibi di personal di Hotel tabata uno di nivel halto. Nan a siña conoce fabuloso Bartendernan, Waiternan cu a cera amistad cu nan, y a demostra nan berdadero hospitalidad di e Arubianonan. E trahadornan di Hotel a mustra e pareha aki, e berdadero beyeza di Aruba.
Nan a mira tambe cu e cambionan haci na Aruba den 50 aña ta berdaderamente fenomenal.
Tempo aya na 1972, tur negoshi na Playa tabata cera for di 12:00 pm te cu 2:00 pm, pa almuerzo y siesta. Restaurantnan tabata ofrece cuminda estilo familiar, y e cuminda semper ta sabroso y di bon gusto.
Den ultimo añanan, e pareha a haci varios viahe pa Aruba, y a hasta cumpra un TimeShare na Casa del Mar Beach Resort pa hopi aña. Tur nan dos yiunan tambe a bin pasa nan Luna de Miel na Aruba, como tambe demas famia y amigonan di nan.
Bishitando Kapel di Alto Vista, a laga nan cu sentimentonan spiritual cu semper nan a keda cana cune. Pesey ora cu nan deseo a bin pa renoba nan promesa di matrimonio, a escoge pa haci esey na e lugar sagrado aki na Alto Vista.
Durante tur e añanan bishitando Aruba, nan a experiencia casi tur atraccion di Aruba, for di un banda di e isla te na otro banda.
Nan ta gradecido na loke e isla aki a haci pa nan. Pesey Fred y Susan a finaliza cu e mensahe aki na ingles: “Thank you Aruba for years of memories and the Lord willing, more to come”.