ORANJESTAD (AAN): Poco dia pasa un tercio riba caya, kende pa algun tempo caba a para bira Adicto Ambulante y ta circula den Centro di Oranjestad,
por wordo mira tin biaha ta baña den fontein, y despues e cana tira bista y coba den tur baki di sushi pa saca loke e por usa.
Den vecindario di Parada di Bus, e persona aki awor ta creando un bista masha mahos mes.
Hasta e tin un hoki, esta un lugar na unda ta warda slof, luznan largo flourescent lights, y ta intimida hende cu e obheto cual por tin consecuencia serio. Hasta el a menaza un ciudadano cu a yame pa “choller”, y por poco e por tabatin consecuencia pe.
Ta basta tempo caba desde fin di decada 1980, cu ningun Gobierno a logra ni percura pa busca solucion di e Adictonan Ambulante aki cu ta circula den Centro di Oranjestad.
Y no mester inventa e wiel di nobo! Djis sigui ehemplo di otro pais y islanan cu a logra resolve esaki. Djis check con Curacao a fix e problema. Of djis check con Medellin (Colombia) a fix e problema aki di Adictonan Ambulante riba caya.
Un observador local a indica na DIARIO, cu el a keda sorprendi cu ningun stakeholder a reuni cu Formador y futuro partner di coalicion pa bisa kico nan plan ta pa pone un fin na e fenomeno aki cu ta sigui forma un peligro pa turismo y seguridad di ciudadanonan.
Ningun instancia tabatin idea? Pesey ningun a bay papia cu Formador riba esaki?
Pesey e observador ta convenci cu awor si pa 2021, a bira tempo pa instancia concerni riba e isla aki actua y haya permiso di Ministerio Publico conhuntamente cu Departamento Asuntonan Social pa kizas interna e Adictonan Ambulante aki na un lugar special (kizas ex-Huis van Bewaring), na unda nan por cuminsa trato medico, calma nan y vigila pa nan evita subi caya.
Riba e potret aki por mira e ‘hoki’ cu e Adicto Ambulante a traha banda di Parada di Bus. Den e hoki aki e ta warda tur loke el a podera di dje y cu e haya den baki di sushi. Hasta e luz largo fluorescent ta poni eyden, y cu e lo por usa como ‘arma’ pa ataca hende riba caya cune.
