Eduard Pieters di fraccion di PPA:
ORANJESTAD (AAN): Parlamentario Eduard Pieters di PPA a indica cu durante e anochi di presentacion di Fundacion Lanta Papiamento na Biblioteca Nacional Aruba, nos a biba un experiencia berdaderamente unico y rico: un anochi dedica na e historia profundo y bunitesa linguistico di Papiamento. Ramon Todd, cu su amplio conocemento academico, a guia e audiencia den un biahe historico, cu no ta solamente informativo, pero emocionante, inspirante y esencial pa compronde nos identidad.
E presentacion no tabata un charla normal; tabata un testamento di berdad: Papiamento ta un idioma fuerte, bieu, construi riba rais, cu ta bay back mas cu 350 aña. Un idioma cu historia masha largo, pero su futuro ta depende di nos.
“Papiamento no ta di awor y su origen ta historico y global. Ramon a mustra un variedad di textonan bieu, incluso e mas bieu na Papiamento, pero tambe otro documento cu ta mustra su desaroyo linguistico,” Eduard a subraya.
Papiamento ta bibo for di siglo 17, ora el a yega Cabo Verde y a sigui su biahe den Atlantico y yega Caribe. El a forma riba e islanan ABC, evolucionando den e siglonan segun e contactonan cu e tabatin cu Africa, Portugal, Hulanda, Merca y hopi cultura mas.
Esaki ta prueba cu Papiamento no ta “un idioma chikito,” ni “simpel,” pero ta un idioma cu un trayectoria mundial y cu un balor historico incalculabel.
Durante e presentacion, Ramon tambe a mustra otro texto cu ta ilustra bunitesa y creacion propio di nos idioma: poesia, traduccion, corespondencia y e documentonan cu ta siña nos no solamente historia, pero structura linguistico y capacidad di Papiamento pa crece.
“P’esey, PPA como partido patriotico ta sigui insisti: Papiamento no ta un simpel lenga di comunicacion; e ta un instrumento pa forma pensamento, habilidad cognitivo, identidad social, herencia y instrumento cultural”.
Mester inverti den Papiamento: Pieters ta haci un yamada urgente: “Gobierno mester inverti, studia y proteha Papiamento.
Si nos ta compronde loke nos a tende e anochi aki, un cos mester keda cla cu si nos no inverti den Papiamento awor, nos ta pone su futuro den peliger”.
PPA ta urgi pa gobierno haci mas inversion den scol pa fortalece e lesnan y literatura na Papiamento. Mester haci mas estudio y investigacion riba loke Papiamento ta contribui na desaroyo di mucha y hoben. Fortalece e institutonan manera IPA y Universidad di Aruba, pa crea departamento, centro di estudio y programanan universitario dedica na e.o. desaroyo di Papiamento. Un pais sin su idioma ta un pais sin rais. Un gobierno cu no proteha su idioma, ta un gobierno cu ta desbalora su mesun pueblo.
Segun Eduard e anochi aki a mustra nos claramente cu Papiamento ta un idioma cu un pasado rico, un presente victorioso… pero cu un futuro cu por keda fragil si nos no actua.
PPA no ta dispuesto pa laga esey pasa. E momento pa proteha, inverti y honra nos idioma ta awor!
