DIARIO mester sali na defensa di uno di e motibonan di su existencia
*Parlamento mester atende e peligernan pa idioma di pais Aruba
*Alma di cultura di e pais mester haya herment necesario pa sobrebibi
ORANJESTAD(AAN)—Kico ta idioma di un pais? Esaki ta e pregunta grandi cu Aruba mester haci su mes atrobe na entrada di un futuro den cual comunicacion ta hunga un papel masha importante.
Den transcurso di tempo e palabranan “medio di comunicacion”a haya un nificacion cu ta mustra directamente riba algun di e posibilidad cu hende tin pa comunica cu otro.
Na Aruba ora papia di medio di comunicacion actualmente, ta papia di prensa, di periodismo, y otro aspectonan cu ta relata na medio di comunicacion.
E palabranan “medio di comunicacion”realmente ta hiba nos directamente na e medio cu hende tin pa comunica cu otro, cu por ta entre otro pa medio di señal of verbal, pues cu uzo di boca na un forma cu hende ta comprende loke e otro ta bisa.
Un idioma ta un forma directo pa hende comunica cu otro ya cu sin conocemento di idioma di otro, hende no por atende cu otro.
Idioma pues ta permiti hende atende cu otro y a nace directamente como un parti indiscutabel di hende, cu hunto a forma pais, a forma nacion atravez di historia.
Papiamento tin un nificacion sumamente importante pasobra e ta entrega e prueba na cientificonan, cu historia di un nacion y origen di un Pueblo, ta manifesta su mes den e expresionnan cu ta haci cu hende ta comunica cu otro.
Cambionan mundial, cu a habri porta pa imperionan rond mundo y na tur continente, a influencia e cultura, e mentalidad, e forma di bida, e idioma den ta comunica cu otro.
E Papiamento di Aruba ta diferente na Papiamentu di e otro islanan y tabata parti di e lucha pa identificacion di e Pueblo di Aruba den e desaroyonan mundial historico.
E respet pa origen di hende y e necesidad pa hende conoce su origen ta hancra den e cultura di un Pueblo cu historia ta uni y mester comunica cu otro pa por identifica su mes enfrente mundo.
E lucha pa Papiamento, ta directamente mara, na e lucha pa reconocimento di Aruba como un Pueblo, un pais, un union di hende, cu derecho pa dicidi riba su propio futuro.
E lucha pa Papiamento, tabata motibo pa e Arubiano, Jossy Mansur, a hiba un lucha pa Aruba tin su propio medio di comunicacion skirbi, cu a bira DIARIO, cu a uni Arubianonan na nan idioma, segun nan costumber y cultura, den e lucha pa reconocemento legal di Aruba como un Pueblo, como un pais.
Rumbo 2024, mas y mas por nota, cu e reglanan cu ta base pa Papiamento como idioma di Aruba, ta wordo geschrap.
Palabranan y expresionnan cu no ta di Aruba, ta deshaci di palabranan autentico di Papiamento cu no ta Papiamentu.
Uno di e problemanan serio pa skirbi Papiamento ta keda, asistencia pa evita erornan cu ta aparece den textonan no solamente pa motibo di falta di conocemento di e idioma Papiamento pero pa falta di e mecanismo pa por reconoce erornan den un texto na Papiamento.
Na 2024 atencion mester wordo dedica na e asunto serio aki.
Un idioma ta bira vehiculo di un Pueblo, como parti di un cultura cu ta wordo transmiti di un generacion pa otro.
Cultura ta dicidi pa mentalidad di un Pueblo y ta identifica un Pueblo.
Como herencia di Jossy Mehsen Mansur, DIARIO tin e deber pa defende Papiamento pa asina tambe reconoce e forma cu Jossy Mehsen Mansur a percura pa awe generacionnan nobo di Aruba, por sigui traha riba e defensa di Aruba como un Pueblo, cu su identidad, su cultura, su historia, cu ta splica pakico e Arubiano y e pais Aruba, merece tur respet di mundo.
Aruba a introduci su Himno y Bandera como representacion di un Pueblo, cu historia humano a crea. Aruba a dicidi pa su ortografia etimologico, den cual e historia di Aruba ta haya expresion na un idioma, cu a nace for di historia di Aruba, cu merece respet!
