Cambio politico radical y explosion patriotico registra na Hulanda
- Pakete basico Gobierno di Reino dirigi riba recuperacion Hulandes
ORANJESTAD (AAN) Un cambio enorme di publico Hulandes a manifesta su mes durante ultimo siman.
Por papia hasta di un euforia cu hopi tempo no a mira cerca Pueblo Hulandes y ta domina politica na Hulanda, cu ta cubri su mes cu e simbolonan di Oranje Boven”.
Kico ta e lugar di Aruba den e formacion di e Gobierno Hulandes nobo y asina tambe e Gobierno di Reino?
Informacionnan cu DIARIO ta ricibi directamente di e informantenan clave den maneho di Reino Hulandes, ta duna tur indicacion cu te awor aki no por tuma nota di plannan concreto di e proximo Gobierno Hulandes pa loke ta trata Relacionnan den Reino y loke di e forma aki mester wordo concretiza den seno di Gobierno di Reino, cu ta basa riba Gobierno di Hulanda y amplia cu representantenan di e paisnan Hulandes den Caribe.
DIARIO a bay den extenso den buskeda di su informacionnan, sigur despues cu siman pasa manera DIARIO a trece dilanti, por a nota cu tabata papia di un base pa Gobierno di Reino, pero cu no tabata tin ningun indicacion cu tabata tin un acuerdo riba e Relacionnan den Reino, cu no solamente ta den necesidad di representante den Conseho di Ministro di Reino, pero tambe di un programa cu ta basa riba e forma cu Hulanda kier duna contenido na e relacionnan den Reino durante e proximo temporada di gobernacion.
Na momento cu DIARIO a bati alarma grandi pa e realidad cu ni sikiera tabata menciona e cartera di “Ministro encarga cu Asuntonan di Reino” pa no papia mes di e cartera “Secretario di Estado pa Asuntonan di Reino y Digitalisacion”, ya tabata visto cu, manera por a spera den e urgencia politico y e cambio di partidonan Hulandes, no tabata tin mucho atencion pa loke ta e plannan directo pa e gobernacion di paisnan di Reino den Caribe.
DIARIO for di momento cu e partidonan cu a forma un Gobierno di cambio absoluto na Hulanda, a papia di un acuerdo, interes di DIARIO tabata kico Aruba por spera den e maneho total, mescos cu e areglonan cu tin entre e paisnan den Reino y di cual algun importante, tabata na discusion.
E realidad Hulandes a sobresali den e exigencianan di votadornan y a bira visibel asina den e plannan di e partidonan politico cu a participa na e eleccion, cu a bira un shock pa mundo politico Hulandes.
Teniendo cuenta cu resultado di e maneho di Gobiernonan Rutte pa e Hulandes, mester a spera exigencianan grandi di parti di Pueblo pa cambio den e maneho politico cu mester ta dirigi na prome instancia riba e Pueblo Hulandes pa loke ta trata Gobierno di Hulanda.
Hulanda cu ta riba lista di e 20 paisnan mas rico na mundo, conoce ciudadanonan cu ta biba riba caya, pasobra nan no tin un cas. Hulanda conoce situacionnan social desastroso basa riba falta di tur loke ta basico pa e ser humano por ta feliz.
Puntonan concreto di e situacion den cual un cantidad grandi di e votador Hulandes ta biba y e forma cu cambio mester presenta su mes.
Formacion di e Gobierno actual a dirigi su mes riba cumplimento cu e necesidad Hulandes y por nota con den e programanan di Gobierno, e presencia di partidonan nobo y e maneho priminti pa Geert Wilders, cambionan grandi ta na caminda y mencion directo por ehempel ta wordo haci pa e sosten real di campesinonan, pa empresarionan Hulandes, pa tur sector di Hulanda.
En general ta e gruponan Hulandes lubida durante ultimo eleccionnan tin e impacto mas grandi den un plan di gobernacion, cu mester drecha e condicionnan di vida di e Hulandesnan.
Na varios ocasión DIARIO a splica cu e dirigente di PVV, Geert Wilders lo dirigi Gobierno cu ta basa riba resultadonan di eleccion cu el a logra como lider, den direccion di cambio favorabel pa e Hulandes biba na Hulanda.
Informantenan ta indica cu esaki ta conduci na exigencianan mas grandi di parti di sigur e Ministro Plenipotenciaro di Aruba na Hulanda, mr. Adi Thijssen, cu mester bira un fuente di dialogo continuo y directo cu instancianan na Aruba.
Ta bira sumamente importante, pa sigur scrutina tur loke bini dilanti den Gobierno di Reino, cu ta wordo forma dor di e Ministronan di Hulanda hunto cu un representante di Aruba, uno di Curacao y uno di Isla Ariba.
Informantenan a indica cu e sosten visibel di Pueblo Hulandes na Geert Wilders ta enorme y cu e Gobierno nobo di Hulanda tin un encargo enorme enfrente e Pueblo Hulandes, cu na e momentonan aki ta presenta un brote di patriotismo y nacionalismo, manera durante ultimo temponan Hulanda no a conoce.
DIARIO ta sigui tur desaroyo na e momentonan aki pa informa e Pueblo di Aruba debidamente.
