Gamma IT Solutions a wordo funda door di Koos Veel na aña 1986. E aña aki nan ta celebrando 35 aña. E tempo ey software development ta algo nobo y por bisa cu Gamma tabata un trendsetter na e momento ey riba e mercado na Aruba.
E prome programa cu a wordo desaroya door di Gamma IT Solutions tabata Payroll Pro. E director y fundador ta Koos Veel, managing director ta Frank Baks y Teiry Croes, Project Manager.
INICIO DI GAMMA
Promer cu Koos Veel a funda Gamma e tabata director di Aruba Aloe y e tempo ey no tabata tin software existente pa payroll na Aruba. Koos a dicidi pa e mes traha un software pa e payroll di Aruba Aloe. E tempo ey tabata tambe e prome dianan di VCC (cu tabata yama “AS Aruba” y nan tabata bende accounting software Exact y Grote Beer). Un dia Bert Vermaas, director di VCC, a bishita Aruba Aloe pa bende su accounting software. Koos a mustre su Payroll software pa Aruba Aloe y den un par di dia nan tabata tin e acuerdo cu Bert (VCC) lo bende e payroll software na Aruba y den Caribe y cu e nomber lo ta “Payroll Pro”. Asina Gamma a cuminsa.
Gamma ta conoci pa su paketenan di software specialmente Payroll Pro HRM, RxPro y RADEX BCMS. Payroll Pro HRM ta un software completo di payroll y HR cu ta esun mas uza na Aruba y den Caribe. Payroll Pro HRM ta conoci pa ta semper corecto den tur calculacion di payroll, sumamente user-friendly y paso e ta wordo desaroya na Aruba mes, door di developers local. E programa ta apto pa compania grandi y chikito, for di un compania di 1 trahado te cu multinationals y door di Gobierno di Aruba desde 2012.
Segun Koos Veel, Director di Gamma “Pa nos a logra trece Payroll Pro HRM den diferente mercado rond di Caribe, nos a partner up cu diferente compania experto den software cu ta encarga pa haci e parti di distribucion y cu ta duna support na e clientenan.
Na Aruba, nos partner ta VCC International, cu ta un compania hopi conoci na Aruba y cu un trayectoria hopi largo riba mercado. Nan ta e expertonan den Payroll Pro HRM na Aruba y nos ta sumamente contento di por tin nan manera partners.
Gamma IT Solutions mes ta haci e distribucion y duna support na clientenan na Curacao y Bonaire y pa e demas mercadonan nos tin otro partners encarga cu esaki.
RxPro ta un programa traha pa boticanan y cu ta wordo uza na Aruba, Curacao y St. Maarten. RADEX BCMS ta e sistema pa maneho y control di frontera cu ta wordo uza na Aruba. E ta ekipa cu e hardware y software mas actual incluyendo ‘multi-biometric capture’ y opcionan di busqueda y registracion. E software aki, RADEX BCMS, ta un herment esencial na e departamentonan di immigracion pa por controla e frontera di un pais.
E aña aki nos a ricibi e bon noticia cu e gobierno na St. Lucia tambe a dicidi pa implementa RADEX BCMS manera nan sistema di control di frontera. Esaki tabata algo sumamente importante pa nos como compania local y nos ta hopi orguyoso di esaki.
Actualmente nos ta den contact cu mas paisnan den Caribe y nos ta spera di por exporta RADEX BCMS pa hopi otro paisnan.
SOFTWARE SPECIALIZA
Ademas di esaki, Gamma ta traha software specializa, Un bon ehempel di esaki ta e Online ED Card.
Nos a mira den e pandemia cu ora a sera frontera y habri esaki bek mester a bin un control enorme door di Covid-19. E Online ED Card a bira esencial pa por habri e turismo bek den un forma controla pa por proteha e ciudadadonan di Aruba.
Nos a ricibi e peticion di parti di Immigracion, DVG y Crisisteam pa por traha hunto cu nan, ATA y Setar pa actualisa e Online ED Card. E Online ED Card ta wordo uza pa cada persona cu lo kier drenta nos isla. Riba e Online ED Card por provee e informacion necesario pa controla si e persona ta cumpli cu tur rekisito pa drenta Aruba.
Esaki a bira un proyecto grandi y cu hopi reto, pero ta algo cu nos ta hopi orguyoso di dje.
E control, vision y eficiencia di e Minister di Salud y tur e otro departamentonan di gobierno envolvi combina cu e tecnologia duna door di Gamma y Setar a haci esaki un proyecto exitoso.
Esaki ta algo cu nos ta hopi gradici pa por ta parti di dje, door cu nos por a presencia tur e proceso y labor duna door di e stakeholders pa por habri portanan bek pa turismo di un manera sigur y controla. “
PANDEMA A PUSHA PA DIGITALISA
Sr. Veel a sigui bisa cu “Manera tur hende sa, e pandemia tabata tin un efecto grandi riba tur negoshi riba nos isla y rond di mundo. E pandemia a pusha hende pa digitalisa y haci uzo di tecnologia awo mas cu nunca. Di e banda ey nos ta sinti cu esaki a pone nos compania yuda hopi cliente pa nan por innova. Nos a tuma e pandemia y a purba saca algo positivo di esaki. Durante e lockdown y durante e periodo unda tabata mas trankilo door cu hopi hende tabata na cas y trahando for di cas, nos a dicidi pa innova teniendo e usuarionan di nos software central. Nos a crea e Payroll Pro HRM App, cual nos a caba di lansa e luna di October. Cu e Payroll Pro HRM App tur cliente cu tin e HR module di Payroll Pro HRM por uza e app gratis. Via e app cada usuario por download nan pay slips of loonbelastingkaart, pidi vakantie, meld ziek, wak nan informacion personal y overtime of pidi timeback. Ademas, nan por contact nan departamento di HR via e app di un manera facil. Nos a ripara cu niun hende ta cana rond sin telefon mas, e ta algo cu bo no ta lubida. Dus purbando di beneficia nos clientenan nos a crea e app pa nan por tin tur nan informacion den nan plant’i man. Nos lo kier encurasha tur hende cu kier haci uzo di e app pa contact nan departamento di HR pa por activa esaki pa nan.
Nos ta wak un cambio di parti di e comerciantenan cu awor ta acepta tecnologia un poco mas cu antes. Hopi comerciante ta haci uzo di maneranan moderno pa por yega nan cliente of pa por yuda nan empleadonan y di e banda ey nos ta contento pa e cambio aki. Ainda falta pa bay, nos tin hopi pa crece ainda den e parti di innovacion y tecnologia, pero nos ta wak cu nos ta avansando y esey ta un bon indicacion pa Aruba.
Na 2017 nos a muda pa nos edificio nobo na Beatrixstraat 41 y nos ta sinti nos ta hopi mas accesibel pa nos clientenan awo. “
INNOVACION
“Sigur mas innovacion y mas uzo di e solucionan cu tecnologia ta ofrece. Actualmente, nos ta trahando hunto cu Gobierno di Aruba pa e desaroyo di eGovernment. eGovernment ta worda crea pa yuda e departamentonan di gobierno pa por conecta cu otro y pa por brinda un servicio mas innovativo na cada ciudadano. Por ehempel, via eGovernment un persona no lo mester bai Censo prome pa pidi un papel di 5 florin pa despues hiba esaki na Setar, esaki lo ta conecta caba y e informacion di e ciudadano lo ta accesibel na e departamentonan indica. Di e manera aki e departamentonan di gobierno ta yuda tur persona cu un sistema mas moderno y eficiente. Gamma ta excita pa sigi innova y sigi crea solucionnan pa cada cliente. Nos ta premira di por exporta RADEX BCMS na mas pais y pa wak Payroll Pro HRM sigi crece riba e mercado di Aruba y Caribe. “
