ORANJESTAD (AAN) – Pancho Croes, di Futura, tambe a hiba palabra den conferencia di prensa, yama pa Prome Minister, relaciona cu e lanzamento di e proyecto “EduTech Fund”.
El a splica cu manera Minister Presidente a bisa, Futura a realiza diferente proyecto di innovacion, di cual “Talent Ontwikkeling” ta un di e partinan mas importante di Futura su code, durante e añanan aki. Despues di desaroya algun proyecto a bin e idea di con Futura no ta drenta scolnan mes y nan ta haya hopi aplicacion, hopi carta, unda mayoria scol tambe kier ta parti di un proyecto piloto. Futura tey pa ehecuta proyecto, pero ta importante pa sa kico ta e metanan, kico kier haci.
El a señala cu hopi biaha, conhuntamente cu directivanan di scol of stakeholders den educacion, ta diseña un proyecto, a base di kico scol tin “in place” caba.
Croes a splica cu e aña aki nan a pone mayoria di nan fondonan pa scol, disponible pa un fondo yama “EduTech Fund” y scolnan mes tin cu entrega conceptonan di proyecto piloto. Nan tin cu traha e diseño y tur criteria ta riba Futura su website cu ta www.EduTech.Aruba.org. Eynan por wak kico mester cumpli cune, y ki tipo di proyectonan.
El a agrega cu pa ta realmente inclui tur scol cu ta bao un schoolbestuur reconoci pa Departamento di Enseñanza, por aplica. E idea aki tambe a wordo pasa na tur persona y departamento concerni. A reuni cu Minister di Enseñanza, Inspeccion di Enseñanza durante un sesion, pa haya feedback.
Croes a agrega cu tin cierto criterionan specifico cu tin di haber cu seguridad, por ehemplo unda ta warda e materialnan cu e proyecto ta bay tin mester di dje, ta bay tin un lugar cu airco na scol, pa por warda nan. El a reitera cu e fondo total pa henter e aña escolar ta 400 mil florin; pa ciclo cu cada un ta mas of menos dos luna, ta 100 mil cu tin cu cubri varios proyecto.
E prome ciclo a habri di September 15 pa November 15. Despues ta bin un periodo di evaluacion door di un Comite independiente, cu miembronan di sector priva, NGO’s cu experiencia den innovacion, tecnologia y educacion, pues, di e sector academico, lo ta esnan encarga pa evalua cada proyecto si nan ta cla cu e criterio, si scol ta cla pe, si e ta realistico cu scol por logra e metanan.
