ORANJESTAD (AAN): Amy Richards, program manager di Pan American Development Foundation (PADF) a splica cu PADF ta un organisacion humanitario internacional cu ta ricibi fondonan di Gobierno Mericano,
pa asina brinda asistencia na esnan mas vulnerable den nos comunidad. Pa mas di sesenta aña PADF den region di Caribe y Latinoamerica a sa di brinda asistencia pa provee proteccion y desaroyo pa personanan cu ta pasando den temporadanan dificil. Esaki tambe ta conta pa Aruba, y e fundacion ta traha hunto cu oficina di Corsow pa yuda otro organisacionnan cu ta haci tremendo trabao pa brinda ayudo y asina por nan sigui cu nan trabaonan y yega mas cerca di nos comunidad.
PADF a presenta nan proyecto cu un di nan socionan, nan partner di mas nobo, 131 pa presenta e proyecto pa nos hobennan cu un toke artistico y creativo pa stimula entendimento, comprension y compasion entre hobennan local y hobennan cu a bin haci Aruba nan hogar. For di 2021, PADF ta trahando pa un comunidad amplio y diverso, cu un bista special riba e inmigrantenan. Na 2023, 131 a wordo acerca pa Pan American Development Foundation pa desaroya un proyecto cu ta stimula empatia bao di e hobennan local y migrante pa cu otro.
Discriminacion ta algo cu den ultimo tempo, mas y mas ta presenta na Aruba. Discriminacion ta ora un persona of un grupo di persona ta wordo trata desigual door di nan rasa, color di cuero, idioma, creencia politico, origen etnico of social, religion, sexo, edad, condicion fisico of mental, orientacion sexual of cualkier otro circunstancia. Discriminacion hopi biaha ta presenta door di xenofobia. Xenofobia ta ora un persona tin miedo of odio pa algo cu ta wordo mira como di afo of straño.
Discriminacion ta haci daño na salud di un persona. Experiencia cu discriminacion ta doloroso, y ta duna un sentimento di no ta forma parti di un comunidad, of tambe di no mag di participa den e comunidad. Discriminacion ta zorg pa e personanan perde confiansa den instancianan y sinti insigur. Na 2023, 131 a crea e proyecto ‘My Story’, y ta implementando ‘My Story’ actualmente na Aruba. ‘My Story’ ta un proyecto cu ta stimula empatia entre e hobennan local y migrante, cu e meta pa reduci discriminacion y xenofobia. Danki na fondo proporciona door di e ‘Bureau of Population, Refugees, and Migration’, 131 conhuntamente cu Pan American Development Foundation por a start cu implementacion di ‘My Story’ na aña 2024.
Ocho hoben local y ocho hoben migrante ta participando na ‘My Story.’ E grupo di hoben migrante ta consisti di hoben naci na Colombia, Haiti y Venezuela. ‘My Story’ ta consisti di 6 sesion. Durante e prome sesion e hobennan ta ricibi tayer tocante Derecho di Mucha y Igualdad. Despues durante e di dos sesion e 8 hobennan local y e 8 hobennan migrante a bishita otro su hogar y asina aki a haya un bista mas profundo di con nan ta biba, cu ken nan ta biba, kico nan ta haci den nan tempo liber, cua scol nan ta bishita y con nan bida en general na Aruba ta.
Un tayer di actuacion y creacion di pintura a sigui den e di tres sesion. Durante sesion 4, e hobennan a crea un pintura cu ta expresa nan experiencia di bida na Aruba, experiencia di nan bishita y nan sentimentonan. Despues di e prome cuatro sesionnan e hobennan hunto cu un ‘film coach’ lo crea un ‘script’ pa un ‘short movie.’ E contenido di e ‘script’ lo encera e experiencia di e hobennan durante nan bishita na otro y nan experiencia di bida na Aruba. Ariba e ultimo dia cu ta sesion 6, e ‘short movie’ lo ser crea y e hobennan lo ta e actornan den e ‘short movie.’
Ariba dia 28 di Juni lo estrena e ‘short movie’ y durante e estreno lo tin un exposicion di e creacionnan di e hobennan.
