E hipocrecia di eleccion na un pais dictatorial no conoce aplauso
- E realidad di un dictador cu su propio fayo como su final
ORANJESTAD (AAN): Na momento cu Covid-19 a bati na porta di mundo, el a topa cu hende den un ansia pa motibo di e amenaza di e dirigente Ruso, Vladimir Putin, cu e lo percura pa un guera mundial.
Covid-19 a entrega na Putin y na mundo e realidad di e poder di un malesa pa deshaci di tur voluntad di hende.
Titularnan den publicacionnan rond mundo, anunciando amenaza di un guera mundial, a wordo reemplaza pa informacionnan cu tabata splica hende con raza humano lo por a sobrebibi un virus cu medidanan pisa.
Manera DIARIO na 2023 a trece dilanti, 2024 como aña di eleccion na paisnan sumamente importante pa mundo y Aruba, lo a percura pa momentonan sumamente interesante.
Durante dianan cu a pasa, na Rusia a tene eleccion of mihor bisa, a presenta e comedia di un eleccion cu a wordo planea pa e homber cu mester a gana eleccion na Rusia, cu ta Vladimir Putin.
Despues di e eleccion, e unico pregunta cu por a keda atras, tabata, kende ta e otro persona cu tabata tin un chens sikiera minimo pa a gana eleccion.
Tabata mas cu cla, cu si a tene eleccion, tabata pa motibo di e hecho cu ya Putin a percura pa e gana e eleccion pa e por sigui dicidi kico lo pasa na Rusia. Ningun hende a spera otro resultado!
Aplauso no por tin pa Putin cu ta un dictador.
Na e momento cu Putin a reclama victoria, na Venezuela e base a wordo pone pa Nicolas Maduro bira candidato oficial pa presidencia di Venezuela durante eleccionnanan cu ainda algun pais na mundo, ta soña cu nan por comberti den un asunto democratico.
E solo hecho cu casi 8 Miyon Venezolano no por vota pasobra nan no por biba na Venezuela pa motibo cu nan no ta sostene Nicolas Maduro, ta e indicacion mas valioso pa comprende kico e realidad lo ta.
Pa mundo e prolongacion di Putin como dirigente Ruso, ta nifica un alarma sumamente importante. Putin mes a cuminsa papia di Tercer Guera Mundial, pa asina bolbe den su ritmo preferi prome cu Covid-19 a silencia su voz.
“Tercer Guera Mundial”tabata loke Putin a priminti despues cu e resultado di eleccion na Rusia a wordo confirma pasobra for di momento cu a yama eleccion, tabata conoci cu e gran pero gran mayoria di votonan, lo tabata pa Putin.
Na e momento cu Putin a proclama su victoria, e forza di horor di guera na Ukraine a aumenta.
Mundo, sinembargo, mester tene cuenta cu e realidad, cu e amenaza pa un Tercer Guera Mundial, cu a sali for di boca di Putin, por bira agenda real di Putin, pa e simpel motibo cu Putin mas cu tur hende ta bon na haltura, cu su posicion ta keda uno cualifica como “entre spada y muraya”.
Tur hende tin enemigo, pero un dictador ta bon na haltura cu na e momento cu e no ta spera, su final a presenta su dilanti.
Putin ta na haltura cu e ta un homber condena na morto, si e no destrui tur loke e mester destrui pa keda na poder.
Si mester di un guera mundial, lo bini un guera mundial, pasobra e no por perde su posicion unico cu ta su motibo di bida.
Ukraine ta esencial pa Putin, cu pa por a reclama victoria di eleccion falsifica ayera, a bira experto den cera boca di tur hende cu e por considera enemigo politico, cu por pone fin na su poder.
Dilanti costa di Aruba, mientras Putin ta proclama su victoria, Nicolas Maduro ta prepara pa presenta su mes como candidato presidencial na Venezuela durante eleccionnan cu ya no por wordo considera democratico pa e simpel hecho cu 8 Miyon Venezolano, cu lo no a vota pa su persona probablemente, mester a busca nan refugio den exterior.
E alianza entre Nicolas Maduro y Vladimir Putin ta conoci. Vladimir Putin a ekipa Venezuela cu avionnan di guera y tur loke mester sostene e poder dictatorial di Nicolas Maduro.
2024 ta yega na un momento di tension internacional serio. Putin ta e persona mas na haltura di e realidad cu e no por considera ningun hende su amigo.
Putin ta lomba contra muraya den un situacion mundial, cu a mishi cu e poder petrolero por ehempel di Rusia.
Mescos cu ta un hecho cu solamente un milagro por evita cu Nicolas Maduro ta e proximo Presidente di Venezuela, tabata conoci cu Putin lo gana eleccion, cu no tabata eleccion.
E Aliansa Noord Atlantico OTAN, ta prepara pa cualkier movecion di Putin contra cualkier pais. Militarismo mundial ta alcansa un momento di inversion enorme den material di guera, cu ta e arma pa dictadornan manera Putin keda na poder cu nan lomba contra muraya, cu ta e posicion mas peligroso di un lider mas odia cu stima!
