Panico den seno di AVP ta wordo scondi cu agitacion politico
*Si Gobierno cay awor Benny por bira consehero Gobierno nobo
* Benny por pasa mas tempo dilanti Mesa Berde cu den Parlamento
ORANJESTAD(AAN)- Su nomber oficial ta Oslin Benito Sevinger. E ta Miembro di Parlamento di Aruba y a skirbi un pagina special den politica di Aruba, cu conoce mas bien como “Benny”.
Na salida di 2022, e lo bira e politico activo cu mas lo sali den noticia den Reino Hulandes debi na e hecho cu probablemente e lo pasa mas tempo dilanti Huez como acusado den un caso criminal, cu e lo pasa den Parlamento di Aruba.
Tabata e lider di su partido y su fiel amigo Mike Eman, cu a forza eleccion di Benny Sevinger como Representante oficial di Arubianonan den Parlamento di Aruba durante eleccion den cual Benny Sevinger a vota como detenido den prison.
Dirigi pa su bon amigo Mike Eman, el a hiba un campaña pisa durante ultimo eleccion y asina a sigura su mes e votonan suficiente pa e bira Representante oficial di Arubianonan como Miembro di Parlamento di Aruba.
Cuerpo Policial y di Prison lo mester a percura pa guardia y medidanan special pa presonan pafor di Prison si Benny Sevinger no a bandona prison en espera di e momento cu su caso presenta dilanti Hues oficialmente, loke durante proximo lunanan lo socede.
Aruba lo cera conoci cu uno di e casonan mas pisa cu historia di persecucion di crimen na e pais a conoce.
Un lista hopi largo y historico di personanan, di cual hopi di nan ta conoci como financiadonan di AVP, tambe ta acusado den e caso y mester duna cuenta y razon pa placa cu lo a pasa bou mesa pa Benny pa asina e otro acusadonan por a haya tereno, pues parti di e suelo di Aruba, cerca Benny Sevinger,
E lider di Partido di AVP, Mike Eman, cu a yama Benny Sevinger su “back to back”, no ta wordo menciona den e caso aki y ta wordo supone, cu aunke e cu Benny Sevinger tabata causa e impresion di morocho politico, e no tabata sa nada di loke tabata pasa cu su bon amigo Benny, cu tabata comparti puesto di Ministro den su gabinete y tabata su mihor amigo den AVP, manera e mes ta bisa.
Si Ministerio Publico y tur miembro di entre otro unidadnan di Cuerpo di Polis cu a investiga e caso di Benny Sevinger tin razon, tras di lomba di Mike Eman cu no sa di nada, Benny Sevinger a haci su mes culpabel di corupcion (pues di a wordo cumpra dor di hende cu tin placa pa cumpre) entre otro durante e periodo cu e tabata Ministro den Gobierno di Mike Eman di 2009 pa 2017.
No tabata e prome caso den cual Benny Sevinger mester responsabilisa su mes como gobernante dilanti Huez.
Den e caso “Eco Cleaner” cu tabata un caso civil, Benny Sevinger prome cu el a bay cas despues di a bira Ministro demisionario na 2017, a entrega terenonan na erfpacht na e compania cu kier a construi apartments, na un prijs abou.
Huez a declara e decision di Benny Sevinger nulo dia 3 di November 2021.
Informacionnan cu DIARIO a ricibi for di basta dia ta indica, cu e turbulencia politico cu ta wordo crea na Aruba actualmente dor di partido AVP, ta directamente mara na loke ta spera e partido durante e ultimo lunanan di 2022, ora Huez trata e caso di Benny Sevinger, cu ta bisa cu el a bira victima di e personanan cu el a confia.
Benny Sevinger ta aparece dilanti Huez com persona den servicio di Pueblo di Aruba, pues Miembro di Parlamento di Aruba cu sosten total di su partido.
Informantenan ta indica cu na e momentonan aki e asunto di BBO y BTW ta wordo uza politicamente pa crea un cortina di huma pa publico pasobra tur cos por pasa ya cu Benny Sevinger tabata miembro di Gobierno Mike Eman, cu no tabata sa nada di e supuesto transaccionnan y un lista di acusacion penal contra Benny.
Informantenan ta indica cu un cambio den Gobierno den e proximo lunanan aki por haci cu hasta por nombra Benny Sevinger como consehero di Mike Eman si Mike Eman logra bira Prome Ministro si e logra manda Gobierno cas.
Fin di 2022 lo ta sumamente explosivo pa Aruba no solamente pa Guera di Ukraine y su efectonan riba prijs cu e partido di Benny Sevinger ta uza pa haya voto y hasta pa baha Gobierno mientras Miembro di Parlamento di AVP lo ta centro di e caso penal contra su persona.
